楊超成推廣Golf年輕化

富商楊超成最近在將軍澳與朋友合資開設高爾夫球練習場，佔地逾五十萬平方呎，他直言投資金額難以計算：「呢度原本係一塊爛地，我哋要好似起樓一樣，除雜草、建地基、水電全部要重新做過，用咗年半時間先完成。」他直言這是一項較慢的回報投資項目，但憑着一股熱誠甘願一拚：「真係為興趣，以前做東華主席期間，識咗幾位志趣相投嘅總理，大家都鍾意打Golf，所以決定一齊搞。」

楊超成與朋友合資開辦高爾夫球場，希望將此項運動推廣至年輕一代。	新建的高爾夫球場，一草一木都要重新興建，投資金額難以計算。	練習場的設施十分完善，高爾夫球車自是少不了。

贊助出國比賽

楊超成希望可以將Golf運動推廣至年輕一族，令一般人認為是「有錢人」的玩意普及化，他說：「以前同幾位總理私底下贊助過一位女學生出國打Golf，覺得對方好有潛質，唔想埋沒天才，依家佢已成為香港數一數二嘅Golf球手。為咗培育新一代，我哋嘅Golf Club有比較多優惠畀教學團體，等學生可以多啲參與唔同類型運動，希望將來有香港人喺國際大賽上得獎。」

香港政府奇怪

楊超成直言香港政府對運動推廣不足，他說：「香港政府好奇怪，一向較少投放資源推廣運動項目，除非喺大賽事攞獎，好似以前李麗珊滑浪攞奧運金牌，或今年東亞運動會足球賽事攞獎，成全城熱話政府先會推廣。」

楊超成亦是一名Golf發燒友，他笑言在球場上傾生意最易成功：「好多人鍾意邊飲酒邊傾生意，但酒醉之後可能唔記得，打Golf就唔同，環境好、空氣好，頭腦都清醒啲。加上打Golf係一項講求技巧嘅運動，唔需要六呎高或好大隻都可以打得好好，適合任何年齡人士參與。」

文：專案組

攝：李廣成

場地：Island Golf Club （將軍澳）