張敬軒聽阿媽話廣結人緣

張敬軒近年在樂壇發展順利，在各大頒獎禮贏取不少獎項，於2008年還舉行了處男演唱會，贏盡口碑，最近軒仔還「升呢」擔任新開設的經理人公司第二股東兼總經理，認真叻仔。

除了事業發展暢順外，軒仔圈中的人緣極佳，與關智斌、王菀之的交情固然深厚，就是孫耀威和容祖兒等也跟他結成好友。去年軒仔邀來不少前輩如林子祥等合作炮製專輯，令他獲益良多，軒仔謙稱：「我覺得將心比心最緊要，因為我當初一個人嚟香港發展，成日覺得自己冇乜可以蝕底，所以冇乜顧慮。（好豪氣？）有時有啲匹夫之勇，我覺得真係幫到人嘅話，自己都開心，我會量力而為。」

感情交白卷

對於獲稱為圈中「義氣仔」，軒仔說：「呢個係阿媽教落，佢不時教我出門靠朋友，幫到人哋嘅就要盡量幫。」軒仔不諱言已經完全適應了香港生活，他說：「都適應香港步伐，融入晒做香港人。」

雖然事業有成，但感情生活仍交白卷，緋聞不算多，他說：「呢啲急唔嚟，都係交白卷。（財多身子弱？）唔係，其實去年身體算好咗，我會更加注重健康。」

採訪：專案組

難得有心人

張敬軒為人夠義氣，而且愛幫助朋友，在圈中人緣極佳。

容祖兒

若要數圈中男性好友，五隻手指真係數得晒，軒仔係其中一個。我鍾意佢夠豪氣同細心，只要你交個心畀佢，佢會雙倍奉還畀你，佢係幫人幫到底，話一就一、話二就二。

王菀之

我叫佢「皇上」，本宮有時都同佢鬥氣嗌交，好似歡喜冤家，但佢真係好唔話得，有次我話唔舒服，佢即刻陪我去醫院，而我屋企啲大小電器或者水龍頭壞咗，佢都隨傳隨到，幫我修理好。

關智斌

佢好夠「雷」（夠義氣），好肯幫朋友，佢外表官仔骨骨，但私下都幾玩得，有時會講啲不文笑話氹大家開心，又好鍾意吹水發表偉論，但又講得頭頭是道，好中Point，有佢喺度就不愁寂寞。