今日（十五日）大年初二正是張學友與太太羅美薇（MayMay）結婚十四周年紀念，自嘲毫不浪漫的學友，僅以「在心中」三個字來發表愛的宣言，並曾送鮑魚表達愛意。
在結婚周年紀念日子，學友大多數會丟低兩個女兒，跟太太MayMay二人世界慶祝，他笑說：「都係食吓飯，冇乜特別慶祝，一切從簡。」學友跟太太由拍拖到結婚超過廿年，最頭痛就是送禮物，他笑說：「送乜鬼，係諗唔到有乜可以送，可以喺埋一齊就OK，係人都知我唔浪漫架啦。」
《迷你》贈愛妻
學友記得有年送過鮑魚給太太，他搞笑說：「係咪好浪漫？因為佢鍾意食，所以咪送鮑魚畀佢。（應該送金銀珠寶？）鮑魚升值快過啲鑽石呀！」學友雖然自嘲為人毫不浪漫，但他覺得自己比太太細心，因為他會記得結婚紀念日，他笑說：「我老婆就唔記得，會問『我哋邊年結婚？』咪96年囉，邊年！」
他可會給太太製造驚喜？學友笑說：「驚就易，喜就難，驚到跳起嘅起就有。」結婚十四周年對太太可有愛的宣言？他微笑說：「在心中。」學友有不少經典金曲，叫他揀選一首歌送給太太，幽默的他即乘機推介其新歌《迷你》，他笑說：「因為佢細粒。」
逼女兒叩頭
學友好重視農曆新年，昨日大年初一撞正西方情人節，他說：「梗係新年大啲。」依據習俗踏正年初一凌晨，學友會跟母親跪地叩頭拜年，太太、女兒也會這樣照做，同樣他也要女兒向他及太太叩頭，他說：「初初佢唔肯架，但呢個傳統我梗係要佢做。」
髮型：Tommy Leung@iisalon
化妝：Terry Yu
場地：日航酒店
文：音樂組設