原本擁有大好前途、家庭美滿又育有兩子的盧惠光（光仔），近年情況急轉直下，除年前與黎淑賢離婚後，最近又遭逢成龍公司遣散，頓失大靠山，變成「雙失」窮爸爸。日前發現他孤獨湊仔，帶着兩個剛放學的愛兒在公園遊玩，「零消費」玩足一個下午。
光仔廿多年前被成龍（大哥）賞識後，一直追隨左右，無論任何時間，只要大哥一個電話，他連待產的老婆都可以不顧。可是，光仔「湊」得大哥又「湊」不到愛兒，可憐兩個愛兒分別為十歲的Jacky和四歲的Jovan，在整個成長過程，只佔得三分之一的父愛，尤幸兩名兒子生性，昨見三父子在公園玩耍，一齊盪鞦韆，沒有大食大玩，都一樣溫馨。
遣散費唔多
其實，今次成龍公司遣散，外間一直以為，堪稱大哥左右手的光仔，會收到一筆可觀的遣散費，從此無憂。但據知光仔今次只收得不足十萬元之遣散費，由於數目不多，頓令光仔這名已達五十歲的「雙失」中年壓力倍增。要知道養大一個仔要花四百萬，不幸是光仔工作無定向，在貧困情況下，難怪他要節衣縮食。
裝身都冇錢
當記者向光仔了解遣散費問題，他支吾以對，不想多講數目是否得十萬、八萬。他說：「總之就唔多啦，我依家生活艱難，忙於搵錢湊仔，無謂開支當然要慳，仲話食日本嘢，我自己做演員靠外表搵食，近兩年都無錢裝身，（有冇覺得心淡？）我唔講啦……我寧願實際啲去搵錢，唔係點養仔呀！」
文、攝：影視組