謝安琪（Kay）再次成為焦點人物，有雜誌指她跟疑似緋聞好友陳奕迅（Eason）的床照被網上廣泛流傳，Kay昨日否認是相中人，堅稱：「我從來冇同任何人影過任何親密照，冇呢種喜好！」
昨日有雜誌登出一張疑似Kay跟貌似Eason於床上錫錫的親密照，令一直流傳的四角關係再次於網上炒起。Kay昨日下午出席「2009四台聯頒音樂大獎」記者會，毫不忌諱表示睇好Eason奪得今年的「傳媒大獎」，認真夠勇，她接受訪問時斷言否認是相中人，她說：「好唔開心，個女仔梗係唔係我啦，（有幾似？）零似！」
台上大講鹹古
Kay愈說愈有火：「呢一年我不斷畀人攻擊，今次真係好侮辱、好傷心，咁樣報道好肉酸，我唔知係咩人搞事，但咁樣做真係好詆毀我，（同老公解釋？）唔使，我從來冇同任何人影過任何親密照，冇呢個習慣，亦冇呢種喜好，我本身生活好健康，呢件事會交畀公司處理。」
另外，Kay前晚以螢光紅連身裙為新城電台舉行的音樂會壓軸演出，在台上大講鹹濕笑話，她說：「我知Mr.個Alan點解沖涼會諗起《森林》呢首歌，因為佢除晒衫對住塊鏡嘅時候，睇到啲嘢令佢諗起《森林》。」
慣被指靠老婆
對於有傳丈夫張繼聰獲無綫總經理陳志雲「寵幸」而點名力捧，Kay說：「陳生佢好正義，好錫我哋，經常對我哋好多慰問同關心，（請佢食飯答謝？）我好耐之前都話想請佢嚟我哋屋企食飯，可惜一直都約唔到！」而張繼聰於另一活動上表示：「我好少見到陳生，只係見過幾次面，太太可能熟啲，（擔心又畀人話你靠老婆？）慣咗喇，唔諗咁多，最緊要做好手頭上工作。」
採訪：音樂組