早前被指英文程度差的鄧麗欣（Stephy），昨日出席活動時表示會進修英語，揚言為將來打入荷里活作準備。Stephy說得雄心壯志，不過在旁的吳雨霏（Kary）即時反應是邊大笑邊大叫佩服，Kary實在有「口不對心」之嫌。
陳奕迅（Eason）、Stephy、Kary、鄭融、泳兒、鍾舒漫、江若琳、HotCha等昨日出席無綫《翡翠歌星賀台慶》記者會，由於Stephy早前以英語接受訪問，表現口窒窒兼文法錯漏百出，頓成網民取笑及抨擊對象，連好姊妹Kary亦忍不住加入「笑」團，認真慘情。
接受善意批評
備受網民抨擊，Stephy說會接受善意批評，未有因此而不高興：「呢單都唔係近日嘅事，不過我冇唔開心，依家發生咩新聞，我都當聽故事咁聽，善意批評我會接受。（呢啲係咪善意批評？）我冇上網睇過，冇理到，不過嗰次突然要我用英文接受訪問，我係應變得唔好，始終英文唔係母語，可以嘅話，我都想進修吓，因為我嘅目標係打入荷里活。」
泳兒sell華麗
正當Stephy一本正經的宣布進軍國際大計，在旁的Kary聞言竟忍不住哈哈大笑，望着Stephy大叫：「我好欣賞你！」Kary此一奇特反應，Stephy即回應說：「梗係要有奮鬥目標㗎啦，去大陸登台都要進修普通話，何況英文係國際語言。」Stephy又透露在《翡翠歌星賀台慶》當晚會與方力申合唱歌曲，當晚她可會打扮性感？Stephy說最緊要高貴，靚的話不介意少少性感，而Kary則會與Eason唱四大天王金曲。
另外，泳兒當晚會與其他女歌手表演清唱，因仍未有時間排練有點擔心，當晚的主題是華麗，暫時泳兒還未知會穿甚麼，不過不會太性感。至於鍾舒漫則會穿高衩泳衣，並配上絲襪跳flash dance。
文：影視組