譚詠麟近年談起家庭事總是眉飛色舞，不過他也有過有口難言的日子，對於華仔一直隱藏家事，直至昨日拖手將關係曝光，他說：「家有家規，每個人都有不同嘅遊戲規則，我覺得冇問題。（網民勁鬧喎？）網民有網民嘅睇法。（華仔今日終於現身盡孝道？）哈哈，張相係咪key上去㗎？（有冇忠告畀華仔？）華仔咁大個人，唔使教，不過，如果係真應該帶畀我哋呢啲世叔伯睇下，呃咗我咁耐。」

接着阿倫也大晒金句：「若要人不知，淨係話畀我知，若要人人知，就講畀志偉知。」

同屬五虎將、與華仔交情深厚的湯鎮業，則認為這不是說話的適當時候，他說：「人哋嘅家事，我唔方便評論，費事愈描愈黑。我覺得喜事都冇所謂，但喺白事上多作渲染，傳媒就好過分囉，依家華仔同太太（指朱麗倩）都好傷心，應該畀多啲私人空間佢哋。」

君如：毋須向人交代

與華仔友好的吳君如，也認同不應評論別人家事，她說：「人哋家事唔需要評論，我好尊重佢決定，好支持，呢個世界冇分對錯，家事係唔需要向外人交代，唔應該批評處理方法。（有冇同華仔聯絡？）有，我有sms佢，佢只係回覆『多謝關心』。（有傳華仔喺百日內結婚？）佢咁大個人結唔結婚唔關我事，唔需要同外人交代，正如外間話陳可辛唔畀名分我，其實每個人都有共識。」

文：音樂組