據元彬憶述，元華的確是好事多為的一等一頑皮仔：「嗰時師傅喺荔園後台放咗祖師爺個像，佢高高在上，好似睇實我哋班細路每晚點樣演戲咁，本來一直相安無事。點知元華有日唔知貪玩定得閒過頭，竟然走去掹咗祖師爺撇鬚出嚟，插入祖師爺個鼻度，搞完一大輪，再將撇鬚放番原位。唔知係咪呢個原因，嗰晚個個上台都有甩漏，唔係行錯位，就係唱錯曲，總之係人都有錯，爭在係大錯定小錯。」

戲班傳統‧一絲不苟

在于占元眼中，戲台上犯錯，下場只得一個，元彬續說：「嗰晚散場後好睇咯，師傅拎住條藤條，逐個『的』出嚟問，一個二個排住隊輪流講自己錯咗啲乜，輪到元華行出去，師傅都未開口，佢話『我掹咗祖師爺撇鬚出嚟玩』，師傅聽完之後嬲到呢，頭先打完嗰啲都要企番出嚟再打過，嗰次真係前所未有咁大鑊，真係要多謝元華咁貪玩。」

元華戲弄祖師爺，根本不用祖師爺「親自」出手，于占元已經搶先嚴懲始作俑者，雖然于師傅的刑罰常會連累無辜，似乎有點不近人情，但只能怪一班徒弟沒有好好互相監察，不去制止元華這種頑皮仔胡作非為的機會。

據元菊憶述，于占元十分重視戲行傳統，她說：「祖師爺像真係唔係隨便掂得㗎，師傅好緊張呢啲傳統習俗，好似每年年尾做完最後一場戲，成班細路要喺個台度跳跳跳，跳勻晒每一個角落，代表我哋今年演完喇！到咗第二年嘅年初二，我哋又要拜神，斬雞頭，然後將雞血灑滿成個場，年年都要咁做。」

劏雞重任‧三毛誠心

劏雞殺鴨，敬奉神靈，別以為只是手板眼見工夫，原來背後充滿壓力，元菊說：「其實揸刀斬雞頭嗰個都好大壓力，因為要一刀切，如果一刀斬唔斷個雞頭，跟住嗰年就會唔吉利，樣樣都頭頭碰着黑，所以三毛次次斬親都好誠心，呢啲嘢唔可以攞嚟玩㗎！」（廿七）