馬浚偉、鍾嘉欣在新劇中再度合作飾演戀人，二人互笠「高帽」大讚對方，馬浚偉自言能與鍾嘉欣合作感到艷福無邊，鍾嘉欣就讚馬浚偉夠專業，無綫芸芸小生之中最喜歡同馬浚偉合作，認真當緋聞男友林峯冇到。
馬浚偉、鍾嘉欣早前為古裝劇《蒲松齡》拍攝一場爬樹戲，劇情講述二人在樹上初次邂逅，並成為鬥氣冤家，期間雖然有第三者陳法拉出現，但二人最終能由冤家變為戀人，難怪無論鏡頭前鏡頭後，馬浚偉亦自誇艷福無邊，更大讚鍾嘉欣勤力，而鍾嘉欣亦回敬表示最鍾意同馬浚偉合作，就連緋聞男友林峯亦比下去。
艷福無邊遭投訴
馬浚偉表示近年經常與楊怡、鍾嘉欣、陳法拉三大花旦合作，揚言身旁有男演員表示羨慕他：「好多男演員都走嚟同我投訴，問我有冇搞錯，點解公司成日畀啲咁後生嘅花旦我，其實我都覺得自己艷福無邊，佢哋三個都有一個特質就係好勤力、好有心機，呢個精神好值得欣賞。不過最搞笑係我每次同楊怡合作，首先會係情侶，之後就冇好結果，而同嘉欣合作，每次都係由冤家變戀人。」
勤力正氣受讚揚
鍾嘉欣對於馬浚偉自感艷福無邊，即得得戚戚笑說：「梗係啦！佢成日同無綫三個最靚、最後生嘅花旦合作喎，而我都好鍾意同馬浚偉合作，佢係無綫咁多男演員之中，最勤力嘅一個，佢好正氣、好專業。（鍾意同佢定同林峯合作？）鍾意馬浚偉多啲，因為佢可以教識我多啲嘢。」
文：影視組