大師兄元龍（洪金寶）、三師姐元秋，以至小師弟元麟均曾試過偷走，但無一例外地，他們得到的結果並非嚮往的自由，而是于師傅的一輪痛打。

逃學威龍‧累及無辜

雖然每位學員入校時，于占元都會與他們家長簽下合約，訂明「中途退學或藉故逃亡，家長要負責賠償」，莫說一班小豆丁還未懂性，對合約內容一知半解，即使知道，此情此境，小孩還是會不顧一切逃走，正如元華說：「三毛（洪金寶）走咗幾次都走唔成咋，如果唔係，我老早走埋一份，學校真係太辛苦喇！」

或者是于師傅早料弟子有此一着，又或者是他說話不愛轉彎抹角，否則也不會在合約中，以「逃亡」這個字眼來表達「逃走」這個意思，可見于師傅一早已事先聲明，只是願者上釣。

眾師兄弟中，以洪金寶的逃走次數最多，這位今時今日被元彪戲謔為「逃學威龍」的元龍大師兄，當年就算逃得出校園範圍，也不敢回家，以免被師傅逮個正着，結果要匿在學校附近的樓梯底，由師弟元華送飯、送棉被接濟，不過于師傅又豈會姑息？

據元武憶述：「嗰時元華送飯畀三毛，畀師傅知道咗，師傅足足打咗元華七十藤，破晒師兄弟打藤最多紀錄，師傅打元華係要話畀三毛知，你偷走，元華知情不報受罰，連累師兄弟，睇你仲敢唔敢偷走。」結果三毛從此放棄再做越柙威龍。

元秋潛逃‧師傅上門

元秋巾幗不讓鬚眉，在「逃走」一事上也不輸蝕，元秋說：「嗰時我學到一半捱唔到，有次唔記得受咗咩委屈，總之好嬲，偷走返咗佐敦屋企，阿媽問我做乜唔返學，我話『師傅要放假』，後來師傅上門叫我返去，應承唔打我，我話『唔打就返』，結果返到去，師傅醒咗我三十藤。」

相比起元龍、元秋，小師弟元麟可算深諳苦中作樂之道，他說：「我偷走後，通常會去戲院睇戲，睇《獨臂刀》、《白骨陰陽劍》，睇到攰就爬上泊喺街嗰啲貨車度瞓，玩到冇錢咯，咪返學校囉！」（七）