法國品牌Christian Lacroix又是一個在金融海嘯下的犧牲者。Christian Lacroix的設計向來將各種色彩玩到出神入化，在時裝界有「調色大師」的美譽，一向造衫不惜工本，尤其對造夕陽工業Haute Couture的每件華衣美裳更落足本錢，02年搞到公司嚴重虧損而被LVMH收購，05年品牌再被賣給美國公司Falics，最終在全球金融海嘯衝擊下，Christian Lacroix大受打擊，以致負債纍纍，資不抵債的情況，迫不得已要向巴黎商業法庭申請破產保護令。事實上，Christian Lacroix在過去22年未錄得盈利，在去年更勁蝕1,000萬歐元，相信對時裝迷來說，大感可惜！
在07年的康城電影頒獎禮中，張曼玉曾穿上該品牌的高級訂造服。名模琦琦坦言未有聽聞Christian Lacroix破產的情況，說：「好慘！因為佢係高級訂造服佼佼者，手工傳咗好多代，冇咗會失去法國精神，日後未必搵到咁嘅手工。」
另一邊廂的李桂蘭則說：「Christian Lacroix設計好誇張，但手工真係好靚，但近年時裝界都唔興誇張設計，好多人都覺老！（覺唔覺可惜？）冇辦法，經濟唔好冇人願意花錢買，或者過多幾年換設計師，為品牌注入新血，到時會興番，好似Gucci一換咗Tom Ford就即刻起番！」