傅穎（Theresa）與小肥分屬好友，捱義氣不收分文擔任對方新歌MV女主角，兩人赴澳門大晒甜蜜，身為地頭蟲的小肥充當導遊答謝Theresa之餘，又賣口乖笑言要刻意避電眼才從後熊抱Theresa，以防成為對方裙下之臣。
Theresa向來與小肥老友鬼鬼，加上早前為配合合唱歌宣傳，兩人朝夕相對令感情更深，當Theresa得知小肥推出新碟，需要找女主角拍攝MV後，即表示不收分文請纓幫忙，她說：「同小肥做嘢好開心，佢成日整古做怪，而且真係太熟一對望就忍唔住笑！」
一日十餐
兩人再次以情侶檔登場，小肥自然駕輕就熟，又不忘賣口乖說：「拍攝冇乜難度，只要唔望住Theresa就得喇，因為要避開佢對電眼，怕畀佢電親，所以MV入面我惟有從後攬住佢。」
為貫徹小肥新碟故事性，其唱片公司更特意為每首歌也拍MV，而這次他們就特意到小肥老家澳門取景，小肥充當導遊介紹歷史與當地美食，讓Theresa一日食足十餐，她說：「搞到我好似拍緊美食節目咁！」而小肥的一班澳門好友，亦出力幫忙拍攝工作，讓他甚為感動。
封街拍攝
原來從幕後到幕前，小肥亦有參與其中，包括歌曲錄製與封面及內頁設計等，他說：「大學嗰陣讀平面同多媒體設計，今次算係學以致用喇，希望可以打造一張代表到自己嘅碟（分身不暇？）試過連續兩日兩夜冇瞓過，不過都係值得！」此外因小肥在澳門具相當高知名度，澳門政府方面收到小肥申請在某街道拍攝，馬上為他封街，而食肆亦義不容辭借出地方，認真巴閉。
文：音樂組