黎明（Leon）昨日白色西裝新郎look出席「Dream Wedding Leon Live Summer 09」記者會，獲贊助商送結婚戒指，但堅稱專業絕不會在個唱公開婚訊搞宣傳，又為演唱積極練跳舞，自信絕不失禮。
黎明於七月十六至十九日在紅館舉行個唱，今次以「Dream Wedding」為主題，昨日Leon在記者會上說：「今年雙春兼閏月，好多人結婚，而每個人都有夢想嘅婚禮。」贊助商送上一對婚戒，Leon笑言：「戒指放喺枕頭上面嘅？」贊助商則祝Leon「同諧共枕，美夢連連」。
不靠婚訊做宣傳
既然是「夢幻婚禮」，Leon是否想準備在個唱上宣布婚訊？Leon連說三聲：「冇、冇、冇！作為Leon入行咁耐係好專業，開演唱會就係演唱會，唔會有任何私心放入去，亦唔會用呢啲做宣傳。」陳慧琳都是在個唱上宣布，Leon心水清說：「有冇男士例子？證明男人心唔同女人心囉。」他強調百分百不會在個唱上發生，否則他就不是黎明。
每日游水半粒鐘
至於Leon今次個唱會有跳舞部分，他笑言：「有晒心理準備，講咗跳就跳，總之大家睇咗唔會覺得難頂，過到大家，過到自己啦。」講到可會請Galie（樂基兒）捧場，Leon謂：「今日Clear版，只談演唱會。」而Leon現時每日早瞓早起做運動練氣，乘船出海游水半小時，更不飲酒，戒吃澱粉質，令愛吃的Leon暫時放棄美食，他坦言：「最鍾意嘅咖喱雞飯唔食得，菜甫炒蛋冇得送飯幾咁痛苦，飲茶又冇得食錦滷雲吞好大鑊呀！」
文：音樂組