黃家強早前一擲30萬買了隻名錶，一心將來贈送兒子，惟他不滿該名錶有時差，多次到錶行理論，但仍不獲退錢或換貨，家強激氣萬分，最後求助傳媒才成功換貨。
家強月前在錶行以近30萬元買下一隻「萬年曆」的名錶，事後發現新錶有時差要求更換不果，昨日家強和太太Makiko再到錶行理論，但錶行依然「企硬」，家強求助無門惟有急電傳媒打救。當記者到場了解後，錶行職員態度稍為軟化，家強與錶行老闆在電話中擾攘一輪，最終錶行老闆願意讓家強以同等價錢換取其他錶款。
仲要補貼萬多元
家強勞氣表示：「買咗隻錶返去個幾月發現佢快咗兩分鐘，我攞返嚟話隻錶有問題，已經冇要求退錢，話換過一隻，佢哋又話停產冇貨，換其他貨又話唔得，只可以幫我整隻錶，仲話會出張證書證明有時差係正常，真係笑話囉，買幾十萬錶有時差仲正常？我真係接受唔到囉！」
然而因錶行內同等價錢的名錶選擇不多，家強千挑萬選才揀到四款名錶，還要補貼萬多元。家強謂：「佢哋點解唔一早肯換，係要逼到人埋牆先肯解決，依家啲錶都唔係我心頭好，但冇辦法。下次唔敢貿貿然Walk in買嘢，都係搵相熟朋友安全啲。」
一變四留埋畀孫
家強謂當日行過見到隻錶很靚，而售貨員說「萬年曆」戴到一百年，他心想：「三十萬第二時畀個仔戴，計起嚟好抵喎，就係咁買咗！」Makiko亦忍不住笑老公，家強無奈說：「依家一隻變四隻，畀埋啲孫都仲得。」
文：音樂組