金牌大風於上周五突然發聲明，宣布公司作出人事調動，Paco擢升為香港區主席，全力拓展電影發展業務，而陳輝虹就出任香港區行政總裁，主理音樂製作及經理人事務。有傳Paco和大老闆鄭東漢不和被燉冬菇，鄭東漢有意栽培兒子鄭中基（Roanld）接掌事業王國，鋪路讓他將來接任CEO，至於早於二月已約滿的基仔，亦不忿恩師Paco被燉，決意跳槽加盟英皇。
人事調動非燉冬菇
由於各種傳言滿天飛，昨日陳輝虹首度開腔接受本報專訪，對於基仔不續約一事，他坦言：「睇番雙方提出嘅條件，喺依家大氣候下，公司似乎做唔到佢要求，如果其他公司有咁嘅金額，祝佢喺唔同環境下再創新成績。」
有傳基仔因Paco被燉才不續約，陳輝虹暗示公司食死貓：「佢要求嘅總額冇得下調，但依家市場萎縮，如演唱會、廣告未來12個月難往上衝，佢提出嘅總額，公司計來計去都覺得好吃力。（傳聞1,500萬簽3年？）唔止錢考慮，仲有好多資源配合。」陳輝虹踢爆基仔提出其中一個條件，是要Paco幫他開戲，而鄭東漢是答允的，他暗寸基仔說：「如果佢覺得Paco被燉而唔簽，依家Paco最需要人幫電影，佢咁飲水思源，應當擸起衫袖留低合作，點解搞咁多新聞！（基仔反骨？）唔會用呢個字，每個藝人為自己着想係合理。」
陳輝虹表示他代表老闆鄭東漢澄清：「公司人事調動有一個積極意義，並唔係外間所指燉冬菇，金牌大風用音樂為中心，衍生相關娛樂產品，以大中華為基地，大陸市場睇得最大，Paco過去幾年做到嘅成績有目共睹，佢將偶像歌手結合青春元素拍咗一系列電影，係時候開始大陸市場，呢樣係冇法兼任，因為大陸太大，要時間投入，Paco有興趣喺有限資源下做突破，對公司未來影響非常大。」
過檔定案稍後公布
至於傳聞鄭東漢有意栽培Ronald出任CEO，現任CEO陳輝虹說：「Ronald冇興趣亦冇時間，佢今年要出國語碟，11月要去台北、台中、台南做演唱會，仲有兩部電影。（鋪路佢做CEO？）相信佢對幕前演出興趣大過幕後。」陳輝虹還透露棒棒堂7月在紅館開演唱會，今年出碟歌手有陶喆、張惠妹、梁漢文、方力申、鄧麗欣和側田，但名單就獨缺基仔。
問前晚飯局是否穩定軍心？他說：「公司同藝人溝通好重要，搞飯局係希望大家了解公司改動。（Paco有冇為調職唔開心？）冇。（有傳臨時call佢出席？）絕對冇呢件事。」
基仔昨晚出席《TVB512再展關懷》節目，問是否過檔英皇？他說：「合約問題有定案，要遲啲公布。（唔會再同Paco合作？）佢一向係我好尊重嘅人，合作多年有默契。（同佢被燉有關？）冇了解，亦唔方便講咁多，同Paco有一定感情，大家心中知。（合作多年唔捨得？）唔答你任何嘢。」
採訪：音樂組