現年17歲的「美少女廚神」胡心諾（Rainbow），自爆被方力申力追後，即被指博出位，頓變「生人勿近」，Rainbow昨日接受訪問時，喊唔停口表示驚「冇得撈」，更語帶含糊推翻之前口供說：「小方冇追我！」
自爆出方力申力追「美少女廚神」Rainbow後，小方即時與對方劃清界線，更頻頻暗示被擺上枱及有人博上位，而《美女廚房》監製錢國偉亦力撐小方，暗指有人別有用心。四面楚歌的Rainbow，坦言擔心在「美少女廚神」復活戰及新一輯《四葉草》被飛，事業受挫的她為此忍唔住喊唔停口！
擔心影響形象
昨日Rainbow為hair himitsu髮型屋試髮型時，當被記者問及會否驚「冇得撈」時，她眼紅紅說：「都驚㗎，好擔心人哋以為我博上位，好影響形象。」Rainbow語畢即眼淚直標，她續說：「小方冇追我，我都唔知出嚟咁大件事！」
Rainbow坦言為此事唔開心，問到當日雜誌訪問情況時，她說：「其實普通訪問嚟，但佢哋見到我用同小方合照相做電話Wallpaper，之後佢哋問我就答。」Rainbow自言中一開始就視小方為偶像，在合作《美女廚房》時拍下合照即用作Wallpaper，但現在已不敢再用。
「自己搞亂晒」
Rainbow多次澄清與小方的關係：「同小方只係朋友，如果再見面都會尷尬，好似冇朋友做咁。」問到是誰先給電話號碼時，她語帶含糊說：「可能係我自己搞亂晒，我都唔記得啦。」她又透露家人亦有因此事為她擔心，而她亦怕校方反感，不時都問朋友：「點算好？」問到她會否致電小方致歉時，她說：「唔敢打電話畀佢，怕愈描愈黑，但好想同佢講唔好意思。」今日她亦會到無綫接受《東張西望》訪問，表示想還小方清白。
文：專案組