所謂「沉船」，其實係鍾意尋花問柳男士間嘅術語，意思即係愛上夜場囡囡咁解。雖然話愛係無分職業貴賤，但喺唔少人眼中，愛上夜場囡囡，總係會落得被騙財嘅下場，因此「沉船」二字總係帶有取之不易，棄之可惜嘅心情。好似早前有位男網民，喺社交應用程式中識咗個女仔，外形唔錯又傾得埋，點知約出嚟見面後，才知道女方原來係一樓一，又冇其他嘅工作技能。自稱思想傳統嘅男網民坦言好鍾意對方，唔想咁易放棄呢段難得嘅愛情，卻又自問冇經濟能力養起女方，因此喺網上呻吓。講真，呢啲問題見過唔少，究竟網民抽水多定真係畀意見嘅多呢？
網友回應：
狩獵怪物的人：愛情雖然無分對錯，又唔應該睇對方嘅職業，但你真係要諗清楚，對方講到明唔想轉工，有人養嘅話就最好。講真，香港地好多行業都唔講乜嘢專業技能，你肯做就得。佢擺明想求人養，呢種性格唔得囉！
悠亞好做得：做得歡場嘅，某啲技術一定唔錯，你係咪因為咁樣而心郁呀？你真係要諗吓喎，若然佢第日覺得你養唔起佢，一個屈尾十重操故業，到時你又已經沉船沉到落海底，到時你真係唔知點算，所以最好就係斷纜。
懶人少女：我唔知你所謂嘅女友，點解咁肯定自己冇其他工作能力，好似我咁，讀書又唔掂，加減乘除都會計錯，結果咪又係搵到嘢做兼可以養到自己。講真，我若然外形好啲嘅話，升職機會仲多。其實佢係想搵碼頭，定係真係鍾意你呀？
Pannel_jyb：成件事擺到明，你心知呢段所謂感情根本唔靠得住，擺段嘢上嚟其實係想我哋鬧醒你啫！我就滿足你啦，你所謂嘅愛其實係因為你好耐都冇拖拍，異性社交又少，結果咪自己攞嚟煩，然後再用個愛字嚟說服自己，仲繼續落去嘅話，真係抵你死呀！
撰文：魂