擁有天使面孔同魔鬼身材嘅索女，當佢哋面對危急關頭嘅時候，男士們都會挺身而出保護對方。不過大家又知唔知道，女神級嘅索女原來都有自我保護能力呢？好似南韓人氣賽車女郎李娥璘就係其中之一，大家咪畀佢嘅柔情外表迷惑，其實佢嘅戰鬥力相當強勁！
南韓有唔少賽車女郎都係由攝影模特兒出身，事關咁樣可以令佢哋先熟悉面對鏡頭嘅工作環境，跟住再喺賽場上亮相，演出就會更加自然。不過對於李娥璘嚟講，情況就有啲特別，佢一出道就以賽車女郎身份登場。話說2009年仍然在學嘅李娥璘，透過朋友介紹而成為賽車女郎，不過當時唔單止遭家人反對，連自己亦唔太喜歡呢份工作，皆因佢同屋企人都覺得賽車女郎嘅形象唔係咁好，要穿着性感制服，又要喺鏡頭前搔首弄姿，既然係咁，點解佢又選擇做賽車女郎呢？
李娥璘解釋因為呢位朋友喺學業上幫咗佢好多，所以對方叫到一定唔會托手㬹，原本當天出席活動嘅賽車女郎，因為健康問題突然甩底，所以朋友就立即找佢頂替。另一方面，雖然李娥璘唔鍾意做賽車女郎，但天生充滿好奇心嘅佢，希望趁呢個機會體驗一下唔同嘅工作，所以即使屋企人反對，佢仍然決定一試。擁有出眾外形嘅李娥璘，第一次擔任賽車女郎便獲得好評，同時佢亦開始對呢份工作產生興趣，更表示最初同屋企人反晒面，但經過兩年努力之後，家人見到佢獲得相當好嘅成績，不但接受同支持佢，每當見到關於賽車女郎負面嘅報道時，更加會嬲到撕爛雜誌添！
2011年李娥璘參加賽車女郎大賽，為咗以最佳狀態示人，佢花咗好多時間進行訓練，因此每晚返到屋企都攰到虛脫。幸好辛勤嘅付出所帶嚟嘅結果，證明佢嘅汗水並無白費，事關最後佢奪得亞軍。經過呢次比賽之後，李娥璘嘅知名度提升到一個新高峰，而屋企人眼見佢為咗目標而不斷努力，試問呢種毅力又點會唔感動到佢哋呢？可能有人會懷疑，如此弱質纖纖嘅女神，點可能應付到高壓訓練呢？原來李娥璘唔單止係賽車女郎咁簡單，更係一位綜合格鬥技教練，曾經教過唔少學生。阿妹解釋因為父親擔心佢會畀人蝦，所以自細送佢去學跆拳道，而長大之後對綜合格鬥技產生興趣，於是又走去學，後來仲做埋教練添！
李娥璘充滿自信話憑佢嘅戰鬥力，兩三個男人都唔係佢嘅對手。阿妹咁好打，會唔會想搵番個同佢一樣咁揪得嘅男友呢？原來揀男友嘅條件都幾特別，首先要求對方友善同埋唔可以口水多過茶，因為佢性格比較沉默，希望雙方嘅性格相近，其次係希望對方嘅工作唔好太忙，忙到冇時間陪佢。照咁睇嚟，宅男就合晒條件啦，唔知李娥璘鍾唔鍾意呢？
簡介：李娥璘雖然以賽車女郎身份出道，但係亦有做過攝影模特兒，曾為多本雜誌拍攝封面及內頁寫真，憑住火辣身材，令人氣不斷飆升。如果大家想了解佢多啲，就要Click入呢個網站睇睇。
網址：http://cafe.daum.net/modelarin
出生地：首爾
身高：174cm
三圍：35、24、35
撰文：魂