體育「睇肉」分唔開？

鹹網熱搜運動比賽

冬奧早前已經曲終人散，而喺運動會進行期間，唔知大家有冇留意過比賽嘅消息呢？唔理有冇留意都好，「Winter Olympics」肯定成為全球最大成人影片網站Pornhub嘅最強熱搜詞。據網站最近公布嘅數據顯示，喺運動比賽進行期間，各個同「冬奧」及「奧運」相關詞語嘅搜尋量都有極大嘅增幅，先從增幅量第3位開始數起，就係「裸體奧運」（Nude Olympics），增幅高達約18倍，而第2位則係「性愛奧運」（Sex Olympics），增幅超過28倍，至於第1位係「冬奧」（Winter Olympics），增幅超過34倍，厲害！另外，可能因南韓係主辦國關係，連帶關於「南韓或南韓人」嘅成人影片搜尋量亦成為最高，其次則係「俄羅斯或俄羅斯人」，而排名第3位竟然係「中國或中國人」。至於最多網民搜尋嘅冬奧主題運動項目，就係「花樣滑冰」（Figure Skating），其次分別係「滑雪」（Skiing）及「曲棍球」（Hockey）。唔通喺普羅鹹片迷心目中，體育真係同「睇肉」有分唔開嘅關係？

超級整容捷克妹

乜嘢叫做贏在發射前？咪就係未出世已經注定有對有錢父母囉！不過咁仲未夠，若然呢對有錢父母力撐自己嘅話，真係冇得輸啦！喺1999年11月21日於捷克出生，現年18歲嘅少女Gabriela Jirackova，憑住參加電視台才藝表演而為人熟悉。不過認識佢嘅主要原因，並唔係佢喺比賽中所表演嘅歌喉，而係佢嗰副超級整容嘅面孔。Gabriela表示自細相當貪靚，唔相信天生麗質呢家嘢，因此16歲開始進行整容手術，喺兩年間佢平均每個月花約1,000英鎊（約11,000港元）去整容，先後進行過削面、隆鼻等手術。上年9月，佢花咗約3,200英鎊（約35,000港元）將原本嘅C奶激增至G奶，同時進行隆臀、切除肋骨等手術，從而令腰部變得更纖幼同性感。其實睇佢整容前嘅照片，外形相當標致，因此令唔少人覺得奇怪。不過最奇嘅係有錢父母全力支持佢兼出埋錢，仲話最重要係個女開心喎！有對有錢兼撐自己嘅父母，真係想點任性都得。

4大敗性行為

想享受到男女共歡嘅性愛，當中嘅技巧真係唔可以缺少，雖然坊間有唔少性愛及兩性關係專家教授過一啲令男女都可以享受到高潮嘅性愛技巧，但係仍然有唔少女性認為男士喺床上總係做錯嘢！究竟喺女性心目中，有乜嘢行為最令佢哋冇晒性趣呢？約會網站Match.com早前就針對呢個問題，對全球5,000名18歲以上嘅單身男女進行調查，總結出4個敗性行為，先從第4位開始講起，有百分之六十二嘅受訪者表示，差勁嘅接吻技巧最令佢哋失去性趣，若然對方願意聽取一下意見，然後再接吻嘅話，相信情況有改善之餘，佢哋嘅吻技亦能得到提升；第3位係唔願郁，有百分之六十三嘅男女表示對方喺啪啪啪時唔願郁，或唔鍾意轉換體位，因而令佢哋好無癮；第2位則係對方缺乏激情，即使自己幾咁主動同賣力，但係對方表現冷淡，如此性愛不如草草了事；至於第1位係太多嘢講，有高達百分之八十二嘅受訪者表示，若然遇到口水多過茶嘅伴侶時會令性趣太減，因此大家記住咪講太多嘢，集中啪啪啪就得啦！

撰文：魂