有位太子，因為尚未有實權，在公司實習而已，高瞻遠矚嘅職員，認為太子遲早會登基，此時先行傍住，將來唔憂冇機會紮起，所以出埋錢帶太子去滾，帶佢去架步玩女人，太子自然十分高興。
有一次，傍友與太子上到一間音樂廳，入到場後見開晒燈，原來警察正在查牌，傍友當堂窒步。
警探曰：「你哋上來做乜？」
傍友曰：「想上來睇吓呢間音樂廳係乜，因為人哋話音樂廳有女侍應。」
太子曰：「走啦，一定係邪門架步，否則唔會有人上來查牌，我哋上有牌嘅舞廳坐啦！」
出到門口，太子曰：「真係好險，行早一步就唔掂，聽講查架步，人客都要報上電話同地址，如果佢哋打電話畀我個老頭子，認真唔掂，今後都要戒。」
傍友見落咗咁多工夫，中途而廢，十分唔抵，曰：「唔怕，我會出術，包你玩得開心，明晚你在家中等我電話好了。」
第二日，傍友放工後，去架步揀咗一個靚女，曰：「太子派我出來揀靚小姐，然後帶去公寓，我認為你外表合格，一陣我替你買鐘，你去送外賣，我已經點咗條財路你行了，你都要畀番多少表示我至得。」
靚女曰：「近來生意咁淡，有得外賣，真係要多謝你，同你又點話啫，去邊間公寓？」
傍友曰：「搵間有電動圓床嘅正房，我同你去先。」於是買三個大鐘，帶靚女去公寓開間房，做完上集，先至打電話叫太子來。
不久，太子來到，傍友曰：「介紹你識呢位公主，好艱難至約到佢出嚟o架！」
太子見係靚女，大喜，拉住手唔捨得放，傍友曰：「我走先，你哋放心傾吓。」第二日，太子大讚傍友本事，傍友曰：「記得睇住我嗰瓣至得。」
夏灣拿
一九七六年四月二十三日