經常有日本十八禁遊戲迷問：「點解成人遊戲嘅劇情都係千篇一律呢？」事實確係如此，睇番近年嘅十八禁作品，劇情總係嗰幾種，若然能夠花啲心思同工夫，絕對可以引起遊戲迷嘅注意，好似日本成人遊戲廠Clockup嘅新作《失眠的羊和孤獨的狼》咁，喺宣布推出時便已獲得極大關注，事關遊戲以玩家第一身視覺出發，化身為一位名叫村木武生嘅男主角，患有慢性失眠症，兼擁有雙重身份，分別係愛情旅館清潔員同殺手。話說效力於暴力團體高級幹部東儀衞嘅專屬殺手村木，每日都過住無精打采卻又平淡嘅生活，唯一令佢安眠嘅時刻，就係接到暗殺委派並順利完成任務之後。某日佢喺旅館遇到出張風俗孃薊，喺莫名其妙之下，佢跟薊發生咗關係，完事之後村木竟然得到前所未有嘅安眠，於是佢希望將薊留喺身邊。點知村木收到東儀衞嘅任務，就係要暗殺薊，原因係客人被薊服侍完之後都會離奇死亡。究竟村木最終會為咗薊背叛東儀衞而大打出手，定係效忠東儀衞而放棄所愛呢？呢點就要等玩家自己決定喇！