有個打工仔，係王老五一名，經常去架步消遣，終於喜歡一個撈女，每周必去見一次面，尋求魚水之歡，見得多，傾得多，情感漸洽。
一晚，打工仔又去到架步，曰：「你喜歡乜嘢，我想送件禮物畀你，因為我出咗雙糧，你對我又咁好，所以趁有錢時買禮物相送，他日分手，亦可留下不盡之情，可供回味，不過太貴重嘅嘢，我就送唔起。」
撈女嘆曰：「我乜都唔要，最好係將你成個人送晒畀我，你今日突然話他日分手，要留下不盡之情，使我傷感，事實上，花無百日紅，我現在仍然青春，但三兩年後就會朱顏漸改，歡場女子，生活不正常，又受摧殘過甚，容易蒼老，遲吓，你亦唔會再愛我，所以你最好娶咗我，等我有個歸宿。」
打工仔嘆曰：「我都想，夫婦至緊要係有感情，我和你相處一室之時，頗有親如夫婦感受，過程高潮迭起，近來我對你想念漸深，偶然想到你在別人懷抱內，我就酸溜溜，覺得十分難過，但我又不能時常來，因為要計住數來使錢。」
撈女曰：「你每次來，每次相聚兩個鐘頭，一百元左右，一星期一次，每月支出四百元，如果你娶咗我，每月畀一千元我做家用就夠，必要時八百都得，我哋可以死慳死抵咁過生活，我捱得窮，如果我嫁你之後，就一心做歸娘，永遠脫離苦海，不必再在風塵飄泊，我會做一個好主婦、好妻子；令你快樂，令你得到家庭溫暖。」
打工仔曰：「你真係咁好？唔嫌我份牛工？」
撈女曰：「淪落到今時今日嘅地步，我點會有資格嫌棄你，如果你肯娶我，已經係我嘅最大幸福。」
打工仔曰：「現時我月入二千元多啲，照計就有資格。」
撈女曰：「咁就好啦，你話聲娶我，我就立刻收山。」
打工仔嘆曰：「可惜我間工廠又話準備裁員，唔知會唔會裁到我，如果我一旦被裁，連養自己都唔掂，又點能夠養你，都係等吓先啦。」
撈女嘆曰：「要等到幾時？信河之清，人壽幾何，我就快有白髮矣。」
一九七五年一月二十九日