以前要創作一個成人遊戲相當簡單，只要有萌爆女角色再加上戀愛題材便可以，只係今時今日單憑呢條橋並唔足夠，仲要喺劇情上花啲心思至得，而呢隻由日本成人遊戲廠Petit Linge最新推出嘅十八禁遊戲《Lost‧Echoes》喺劇情上頗花心思，故事不但以戀愛為主題，更加入近年流行嘅穿越元素，配合出色嘅角色設計，難怪備受遊戲迷期待。
故事講述酷愛攝影嘅男主角悠樹里久，某日如常喺街角上捕捉城市內每處景物時，跟一位自稱名叫龍泉卯實嘅神秘少女相遇，對方問悠樹有冇諗過回到過去，改變一件曾經發生過嘅事，而佢可以幫到手。原來龍泉卯實嘅真實身份係個小小嘅神明，佢之所以問悠樹呢個問題，係因為悠樹嘅青梅竹馬兼暗戀對象立花結佳，喺430年前叫立花千代，卻遭受殺害，雖然佢嘅靈魂已轉世為今日嘅立花結佳，但係怨氣仍然未化解，並且慢慢蠶食今日嘅靈魂。如果悠樹想救結佳嘅話，便要同龍泉卯實一齊回到過去阻止呢件事發生，不過救人機會只得一次，否則一切難以挽回。
開發商：Petit Linge
售價：￥8,800（約HK$616）
發售日期：2018年1月26日
撰文：魂