有座大廈，搭棚掃灰水，一連兩晚，都發生住戶被爆竊事件，有個戶主，認為唔妥，隨時有被賊人入屋可能，於是特製一支狼牙棒，木棍上貫以利針，放置床下，準備有賊入屋，就同佢做忌。
是晚，果然有兩個賊摸入來，但戶主瞓到迷迷懵懵，完全唔知，直至被匪徒推醒，並用繩綁起。
匪徒曰：「啲錢放喺邊？話畀我哋知，咁就唔使我哋向你用刑逼問。」
戶主曰：「啲錢放喺梳妝枱最底下嘅櫃桶，另有金飾股票，千祈唔好攞我命。」
於是兩個賊人，將梳妝枱嘅櫃桶猛撬。
戶主曰：「我有鎖匙，唔使撬，否則會嘈醒隔籬鄰舍，你放開我，等我拿條鎖匙畀你哋。」
匪徒曰：「都算你幾合作。」鬆開咗戶主手中嘅繩索，戶主便取匙出來，順手摸入床下底，將狼牙棒拿在手中，突然向一個匪徒迎頭擊落，跟住又將另一個匪徒打到滿頭鮮血。
戶主之妻，此時扎醒起來，大聲叫打劫，鄰居聞聲而至，見兩個匪徒已經被打到好似血人，立刻將佢哋綁起，並撥電話報警。
一個大嬸曰：「吓？又係呢兩個臭飛，昨晚就係佢哋嚟我屋企爆竊，臨行前仲非禮我女兒，今日仇人見面，非報仇不可，不必咁快交畀警方。」
此時已經有兩個軍裝警員來到，制止各人不能使用私刑，干犯法紀。
一個少女，排眾而前，曰：「等我認真睇吓佢哋嘅尊容。」
凝視之下，少女曰：「冇錯，晚上來打劫，兼剝咗我件衫，就係佢哋。」激憤之餘，提腳猛踢，每一腳都係掃落去兩個飛仔之太廟，警察阻都阻唔住。
不久，兩個飛仔暈倒，並見褲襠染紅。
警員曰：「好啦，搞出人命，你哋都會犯官非。」
一九七四年十二月三十一日
「飛仔」一詞點嚟嘅呢？講法主要有兩種：一，廣東話中有「好食懶飛」一詞，而唔願工作嘅青年便簡稱做「飛仔」；二，當年呢類青年鍾意梳俗稱飛機頭嘅髮型，梳個飛機頭嘅不良青年，便被簡稱做「飛仔」。不過可以肯定係濫用私刑真係會犯法，千祈咪學呀！