小事認真做，大事慢慢做！啱唔啱？但有幾多人會咁做？最好梗係快快手搞掂收工啦！係呀，唔只打工仔係咁，依家連寫真都吹緊呢陣風，求其喺海灘影吓女，晒波露腿，咁就叫寫真，完全無個性可言，簡直係流水作業，每期都一樣，唔怪得連網上版都冇性趣睇啦！不過當中亦有人會認真製作，《Mancave Playbabes》就係其中之一，佢係一本美國男性雜誌，集娛樂、體育、科技、時裝潮流及品味於一身，之不過最多人關注當然係索女啦！
你可以話細佬膚淺，不過你最好睇咗先講，事關由封面到封底都有大量充滿個性嘅Model，有溫柔有狂野，有好動亦有女人味滿瀉嘅索妹，你以為雜誌不斷花錢搵新女，錯喇，其實好多都係熟口熟面，經常出現喺各大男士雜誌內嘅囡囡，咁點解睇《Mancave Playbabes》時硬係覺得唔同啲嘅？因為雜誌嘅宗旨係要拍出魅力，佢哋會花時間同心機了解囡囡，清楚佢哋嘅個性先埋位拍寫真，粗製濫造嘅情況絕不容許出現。唔使多講，單係睇封面你已經可以發現，攝影師技術固然重要，但囡囡身上嘅服飾都好緊要，唔一定例牌比堅尼先吸睛，一件牛仔褸或一塊布都可以令男人充滿遐想！除咗睇靚相，記得睇埋囡囡嘅專訪，巴打可以了解更多囡囡對性感嘅睇法。總結呢本雜誌係一本非常有Heart嘅月刊，不過要鬧嘅係官網更新速度慢，啲料舊到冇朋友，Follow佢社交網好過！
書名：《Mancave Playbabes》
售價：約HK$55
撰文：祖