師傅成日教我做人唔好墨守成規，做事手法死板，托杉都唔識得轉膊就做邊一行都冇出頭。而喺瞬息萬變嘅樂壇亦係一樣，打扮、舞姿、曲風及MV拍攝手法一成不變，只會加速被淘汰！好似以AV女優為骨幹成員嘅日本美女團體惠比壽★麝香葡萄咁就做得啱喇，佢哋不但經常喺專屬電視節目中搞新意思，最近更以VR技術拍MV，仲換上性感新制服，令大家耳目一新！
早一陣子，VR技術普及起嚟，搞到大家都趕住買相關產品，享受一下猶如置身其中嘅視覺效果。不過，到近期VR相關發展就會好似停咗落嚟，然而買咗VR裝備嘅朋友，特別係成年男士就絕對唔使驚冇嘢睇，因為日本AV界近期密密炮製VR作品，好似巨乳尤物吉川愛美咁，早前為咗幫KMP拍VR作品，連正常AV都唔拍喇。而呢股VR熱潮喺日本AV界愈演愈烈，更加伸延到主要成員為AV女優嘅女團惠比壽★麝香葡萄添！佢哋嘅最新MV《バッキャロー》以VR炮製，如果大家戴住副VR眼鏡欣賞的話，就可以體驗360度被女優包圍嘅精彩感受！雖然班女優唔係圍住你嚟剝光豬演出，但係沉醉喺佢哋動感十足嘅舞姿以及感染力特強嘅歌聲當中，亦不失為一種極上娛樂享受！有興趣可以上網睇睇。
網址：https://www.youtube.com/watch?v=I7lW0XnsREA&feature=youtu.be
有新MV當然亦有唱片推出啦！惠比壽★麝香葡萄嘅首張音樂專輯《喜怒愛樂》將會喺4月26日上市，專輯分為三個版本，作為死忠粉絲嘅相信會大破慳囊一次過買晒三個版本喇！而喺5月13日，麝香葡萄就會舉行日本全國巡迴演唱會，第一站係鹿兒島。喺巡迴演唱會之前，麝香葡萄一眾成員都馬不停蹄咁出動，因為4月16日開始先後到廣島、梅田、名古屋同涉谷進行一共5場《惠比壽★麝香葡萄大トロ●中トロ●クアトロツアー2017～大漁～》演唱會，將精彩嘅表演、熱鬧嘅氣氛以及性感舞姿獻畀大家！而製作單位亦已經為麝香葡萄呢次演唱會推出一系列產品，準備打劫粉絲們嘅荷包，入場支持佢哋嘅朋友記住帶備多啲銀両喇！
如果大家有睇過AKB48、SKE48等等成員數目極多嘅女子團體演出，應該都會覺得好似走馬看花一樣，班成員走來走去，實在睇唔清楚佢哋個樣同身材。而成員人數亦達到27人嘅麝香葡萄都有類似情況，從佢哋嘅最新MV當中，都會發覺因為人數甚多，而睇唔清每個成員嘅樣貌，之但係有位成員大家一定會較為留意，呢位就係早前喺Sky PerfecTV成人放送大獎2017當中勇奪最優秀新人獎嘅大食小花桃乃木香奈喇！因為香奈喺MV當中大部分鏡頭都站喺最前排，至於喺成人放送大賞獎輸咗畀香奈嘅人氣王三上悠亞又要輸多鋪，同AV天后明日花綺羅一樣淪為香奈嘅左右護法，冇得企最當眼嘅中央位置！另外，喺最新一集嘅麝香葡萄專屬深宵節目《麝香葡萄之夜》當中，亦一樣由香奈排呢個中央位帶頭獻唱，證明香奈喺團體當中地位備受肯定喇！
撰文：賢