見到女伴喺床上有高潮反應，男人當然開心，但係原來大部分都係假扮高潮，背後仲隱藏住出軌嘅意圖添！首次約會，建立一個好印象相當重要，有調查顯示第一次同異性食飯叫杯啤酒最好。講到約會，亦有調查以了解日本男士最想同邊一個職業嘅女性交往。
男人一般都心直口快，有乜都會爽快咁講出嚟，但係女仔就唔同，通常都表裏不一，例如男人話送花，佢哋就會話：「唔使啦！幾百蚊買紮花，不如食得豪啲仲好啦！」事實上，佢哋心入面當然想食豪華大餐，但係亦想收到男友送嘅花。大家可能會覺得女仔咁做人實在太假惺惺，但係喺床上佢哋更加假囉！早前《性行為檔案》發表咗一個調查報告，當中訪問咗138位年輕女仔，發覺有8成都習慣喺床上假扮高潮反應，點解佢哋會咁做呢？性學專家Tammy Nelson博士表示女仔咁做某程度上屬於向男方施以懷柔政策，令男方更為興奮，咁就可以快啲完事，背後嘅原因仲包括女仔知道到男方根本上就唔識，亦不能滿足到女方嘅真正需要。博士補充話，女仔假扮高潮嘅頻率愈高，亦反映出佢哋愈想搵個第三者滿足自己，更有可能係早前已有出軌行為，扮高潮只係敷衍正印男伴而已。
早前有個舊同學打電話向我求教，事緣呢位同學乃係宅男一名，溝女經驗甚少，最近佢就時來運到，約到個女仔出嚟慶祝生日，同學就即刻問我有咩餐廳適合呢個首次約會，小弟介紹咗幾間有情調西餐廳畀佢。話時話，搵到有情調嘅餐廳，要畀到好印象對方，仲要喺飲品方面留意。日本約會網站Omiai早前就做過調查，發現有58%受訪男性認為喺初次共進晚餐時，女方如果選擇飲啤酒的話，對該女仔印象分就會偏高，而女仔方面亦係咁諗，有受訪女仔表示男方飲啤酒，可以令女仔覺得氣氛冇咁拘謹，亦會覺得男方性格較為開朗、知無不言。至於飲幾多杯會令印象分進一步提高呢？受訪嘅男女雙方都表示彼此杯數相同就最好喇！男仔覺得女仔肯陪自己飲啤酒，表示女方已經將戒心放下，至於女方則覺得大家身份平等，自己亦受到男方尊重。
有朋友同我講，拍拖娶老婆最好搵個女教師，點解呢？朋友就話家陣教師工作壓力好大，成日都要由朝做到晚，就算係非上課日子亦要帶住班學生哥進行參觀、體驗等活動，返到屋企仲要改試卷、改作業，故一定唔會太黐身，相信會有好多時間做自己想做嘅事，包括偷食。個人就認為難得搵到個女伴，應該要好好珍惜至真！除上述原因，相信本地唔少男士鍾意又或者好想試吓同教師交往，咁喺日本又點呢？最近日本網站「Menjoy!」就訪問咗500位成年男士，睇吓佢哋最想同邊種職業嘅女性交往，結果發現最多男人想結識護士，原因包括覺得護士親切又有愛心，仲好識得照顧人；第二個職業就係空中小姐，有受訪男士表示覺得同空姐拍拖有優越感；第三個職業亦同醫護工作有關，就係女醫生喇！有男士認為女醫生收入有保障，同佢哋一齊仲可以獲得免費嘅健康資訊添喎。
撰文：賢