喺日本拍得寫真集嘅女優，多數都要有番咁上下身材至得，皆因目標觀眾都係男人，而男人皆愛巨乳。之不過，世事總有例外，只要女優夠可愛，吸引力一樣可以拍得住甚至超越巨乳女優，丹羽未來帆就係好例子喇！
相信好多年齡同我一樣有三、四十歲嘅朋友，都用耳朵感受過老一輩嘅鬧人用詞藝術，點解稱之為藝術呢？除咗因為用詞變化多，唔使用上五字粗言，都能夠將目標人物詆毀到極致，例如「呢個衰人真係冇天裝冇地載」，意思即指其人衰到天地不容，不過如果你問我呢種人係點嘅款，我就好難再深入形容，我只知青春偶像丹羽未來帆一定係有天裝，因為佢曾經係特撮片集《天裝戰隊》嘅黃戰士。25歲嘅未來帆活潑可人，一睇就知佢性格調皮，容易逗人開心，雖然好多人望上去以為佢係來自東南亞，不過阿妹多次澄清自己係純種日本妹，家鄉位於愛知縣。未來帆氣質與一般水着妹有所分別，身材亦差一大截，瘦削嘅佢屬於平胸一族，然而，阿妹佢就話雖然冇巨乳，但係苗條健康嘅身材充滿陽光活力，一樣能夠引死麻甩佬喎。
正因為身材夠瘦，加上氣質可愛，能夠將少女系時裝嘅吸引力完全發揮，2003年丹羽未來帆參加日本時尚雜誌《nicola》年輕模特兒選舉並成為冠軍，從而被聘請為模特兒。之後，喺日本模特兒界同藝能界都發展得唔錯，除咗不時榮登雜誌封面，仲以歌手身份登台。到2010年，未來帆就攀上一個事業高峰，就係成為特撮電視片集《天裝戰隊》嘅黃戰士，成功入屋。到2013年又到達第二個高峰，獲邀成為乳產品代言女郎「Dororich Girls」，證明平板身材嘅佢有吸引力之外，仲有機會擔任天氣預報節目《ZIP！》嘅女主播，阿妹表示夜晚兩三點先於網台廣播，晨早又要爬起身報天氣，起初都幾辛苦，不過為咗做好呢份工一於頂硬上，家陣已經習慣咗。另一方面，模特兒出身嘅未來帆家陣經常為雜誌工作，成為一代時尚達人，樂於同各界分享潮流打扮心得添。
丹羽未來帆熱愛潮流打扮，大家Click上佢個博客就會知道阿妹近期有乜扮靚心得，各位女士要追上潮流不妨以佢作為指標。
網址：http://ameblo.jp/niwamikiho-official/
年齡：25歲
身高：5呎4吋
三圍：31-23-31
撰文：賢