內地把愛好動漫Cosplay嘅朋友，稱為Coser，其中最具人氣嘅，真係接騷都接到手軟，因為除咗動漫展，唔少商場都會搵佢哋嚟演出助興。今日就介紹一位最火紅嘅Coser畀大家認識，名字叫七夜娃娃。
七夜娃娃原名湛文博，個名都幾男仔吓，原來佢細細個時真係好男仔頭，但後嚟慢慢愛上動漫作品，至將自己打扮回女仔。話說佢05年左右開始接觸Cosplay玩意，最先係跟隔籬屋姐姐齊齊打扮吓就出街行個轉，發現沿途引嚟艷羨目光，於是挑起條筋繼續玩落去。至於個藝名，夜娃娃係佢乳名，七就係幸運數字，佢將兩者混合，加上「七夜娃娃」聽落有少少日本Feel，好啱Coser用，於是一直沿用至今。阿妹之前都係以玩票性質參與，企成日或者畀人影相係冇錢收嘅，而早期啲造型服裝，全部都係自己貼錢去做，以一個學生妹嚟講做套衫都幾貴吓，但為咗興趣，佢話三餐捱麵包都冇所謂！
大家咪以為佢係啲不學無術，只識玩樂嘅小妹妹，唔怕話畀大家知，佢係大學生，為咗興趣，主修日文，佢話家陣睇日本原裝漫畫，真係原汁原味好多。出道至今，一共扮過上百個角色，而有攝影作品記錄嘅都有四、五十個，當中不乏性感造型。問佢怕唔怕裸露身體？佢話原著係咁性感，就應該保持性感，所以就算裸露少少都絕對冇問題。而近年網絡遊戲盛行，阿妹更做過多個遊戲嘅代言人和真人活模，唔少遊戲取得成功，有可能因為阿妹把當中角色演活。而七夜娃娃除咗企定定影相外，原來做司儀亦難佢唔倒，唔少動漫活動或者Cosplay比賽，都會搵佢做主持齊齊開心。
簡介：七夜娃娃有多個專屬網站，但唔知佢忙定係懶，只加一兩輯相就唔理，目前最多佢照片嘅，算係呢個網站，值得瀏覽！
網址：www.moko.cc/sitiyoko
出生地：北京
三 圍：33-22-34
身 高：165cm
撰文：龍四海