自從人類走出洞穴，成為都市內嘅生物後，人類同大自然嘅關係愈嚟愈遠，只係隨住生活壓力愈嚟愈大，有時都想走番入洞穴，希望同大都市嘅生活分開一陣，可惜鬧市中究竟邊度可以搵到洞穴藏身呢？澳門嘅酒吧The Cave就係一個好選擇。顧名思義，The Cave裝修如一個真正嘅洞穴般。入到去岩石嶙峋嘅牆身同天花，讓人恍如置身洞穴中，彷彿遠離大都市，身心即刻得到解放。此時手執一杯The Cave特別調製嘅Cocktail，同老友把酒談心，更係舒服暢快。唔少嚟過嘅玩家，都鍾意坐喺走廊度嘅兩人座位，事關佢嘅座位排得夠開，唔怕悄悄話畀人聽到，談心最好不過。至於想熱鬧嘅話，亦可以坐喺佢嘅卡拉OK大廳，邊興奮唱歌又得，以掌聲鼓舞好歌之人亦得，邊種玩法都悉隨尊便。