一提到包青天，相信香港冇乜人會唔認識，事關佢嘅影視作品，幾十年嚟都不斷推出，歷久常新，但喺香港好似冇供奉包公嘅廟宇，相反，喺澳門福慶街近鏡湖醫院就有一間包公廟，話說呢間廟建於清道光年間，當其時澳門出現瘟疫，死咗唔少人，街坊父老認為有污物作祟，提議以包公像巡遊，希望借其神威鎮妖除魔，當一巡完街，疫情真係得到改善，於是大富人家就夾錢起咗間廟嚟供奉包公，而包公廟除咗鎮妖除魔聞名之外，由於佢鐵面無私，斷案如神，所以街坊們一有爭拗，有理說不清時，就會跑去包公廟擲「聖杯」，請包公嚟定案，當時婦女們因為不便上公堂，而且爭拗一般都屬小事，所以來者多是婦女，由於多婦女出入，此廟亦成單身漢經常嚟（目及）女地方。