以前嘅婚姻除咗要有父母之命同媒妁之言，仲要門當互對，竹門對竹門，木門對木門，做低下階層如果想娶阿乜員外個女，真係發夢都冇咁早。而呢種階級觀念早年喺外國亦一樣，小說《查泰萊夫人的情人》就係講階級矛盾，以及高低層之間發生嘅不倫之戀喇。1981年，電影《查泰萊夫人的情人》就係改編自呢本同名小說，飾演查泰萊夫人嘅係《艾曼紐》嘅女主角Sylvia Kristel。
電影故事就講述查泰萊出身自貴族之家，雖然繼承咗屋企嘅大筆財產，可以話富甲一方，但因為早年參軍受傷，搞到變咗殘廢，不能人道。故此，佢老婆就要守生寡，起初都可以依靠沉迷於老公寫嘅小說而撫平慾念。後來，夫人嘅慾火愈抑壓就愈旺盛，之後就同到其家中作客嘅劇團小伙子發生關係。當二人感情轉淡之後，剛巧家中又僱用了一名礦工出身，亦曾經參軍嘅工人梅樂士。梅樂士健壯又有男人味，令夫人神魂顛倒，梗係要投懷送抱啦。雖然梅樂士知道同主母私通係唔啱，但係又難抵慾念，於是二人終日縱情色慾，樹林、石屋等地方都變成佢哋解放自己嘅場地。Sylvia Kristel本身狀態高企，魅力逼人，舉手投足都盡顯風采，真係迷死人。而佢同梅樂士嘅調情同野外交歡場面誘人而不淫，凸顯出一種高雅又浪漫嘅感覺，令作品堪稱情色片中嘅經典。當然，梅樂士作為低下階層，能夠同貴族夫人翻雲覆雨，令普遍都係中下階層嘅觀眾睇得更有投入感，亦係《查》片成功嘅因素之一。
撰文：賢