做脫星幾時都想出位，事關咁至有運行！即使宣布正式引退都好，事必要撈多筆推出精選四仔，奇怪在脫星Marketa Brymova竟然粒聲唔出玩收工，直至消失多月至被傳媒發現，區區嗰廿六歲就退休歎世界，究竟佢想玩乜呢？
脫星Marketa Brymova拒絕再露，可以話係四仔界一大損失，事關現今甚少呢類咁有個人性格嘅脫星壓場，但亦有人話因為佢太固執，搞到自己撈極唔起喎！有傳Marketa Brymova多年嚟都堅持三不路線，一不玩性虐、二不玩雜交同埋三係堅持要露得有美感，喺四仔界僧多粥少嘅情況下，咁多堅持同尊嚴等如斷自己米路，因此阿妹喺公司都甚少戲撈，即使你弗爆都係咁話！而當事人亦坦白承認話：「我知道過去錯失好多上位機會，不過我至今都無後悔過，反而要違背自己去迎合觀眾，我怕會食唔安坐唔樂！」
雖然話有性格係好事，但都唔可以當飯食，喺近六年嘅四仔生涯，阿妹話係表面風光，實則冇啖好食，無工開嘅日子都係接吓脫衣舞騷，甚至曾有老細想包養佢，但阿妹都一口拒絕。Marketa Brymova話：「假如要畀人控制，要求我隨傳隨到，咁不如喺四仔界努力啲，相信仲搵得多，不過唔好睇到我咁清高，事實我都有送外賣，得閒同啲富豪執番劑，都幾好搵o架！」要講到真係好搵，又點及得上引退前最後一部作品先？觀乎現今歐美日韓脫星，例牌臨尾挖多筆，阿妹粒聲唔出引退，莫非又玩閃電結婚？「當然冇咁嘅事，純粹覺得四仔界唔好玩，突然想退出就收工囉！不過我認為，唔學一般脫星出最後作品，影迷反而更懷念我，甚至不斷買我過往作品，到時拆帳我仲分得多啦！」Marketa Brymova講到自己好醒，但有網民就認為佢呢鑊係假引退，皆因佢至今從未親口承認，到時一個屈尾十，彈套新四仔出嚟都唔奇！
撰文：祖