根據《黃帝內經》記載：「陰陽四時者，萬物之始終也，死生之本也，逆之則災害生，從之則苟疾不起……」意思係人嘅生活要跟從四季變化，不可逆天而行，否則災害疾病都會因此而生，所以古書認為男女性生活，一樣要跟從四季而有所變化。
撰文：小德
古書記載春天為四季之首，大自然萬物復甦，生機蓬勃，係呢種「天地俱生，萬物以榮」嘅季節裏，人嘅精神同身體機能，都從冬天嚴寒嘅天氣裏甦醒過來，漸漸回復到最高嘅狀態，呢個時候性生活會比冬天增多，但一定要克制，不能過度，若過度就會危及五臟六腑，令身體出現毛病。
而到咗夏天，花木繁茂，陽氣勃現，生生不息，呢個氣候人嘅精神同體質會進入高峰期，性慾特別旺盛，係男女性生活最好嘅時機，但要量力而為，不可過度。如果能順應自然，正常地將體內嘅陽氣宣洩，人嘅身心會有輕鬆嘅感覺。
到咗秋天，草木開始凋落，陽氣漸轉薄弱，人嘅神志同埋欲望，都應該慢慢放緩，調節心身好度過嚴寒嘅冬天，所以性生活一定要減少，不能再同夏天一樣，數量比春天可能仲要少，令身體內嘅陽氣不再無謂宣洩，做到藏精儲氣，固本培元。
最後到咗冬天，寒冬降臨，萬物潛匿，陽氣潛藏，呢個時候，應盡量減少性生活，特別係上年紀同埋體弱多病嘅人士，如果過度宣洩體內陽氣，機體嘅抗病能力就會下降，容易引發出各種疾病。所以古人早有明言，春生，夏長，秋收，冬藏，要身體百病不侵，就要跟住四季嘅特性嚟照顧身體，咁就唔會虛耗陽氣，令身體遇到不必要嘅傷害。所以房中術嘅學問，大家真係不容忽視呀！