女人面相生得好，就會「旺夫益子」，相反，如果遇上「佗衰家」嘅面相，就會令好哋哋嘅男人行差踏錯，輕則生意失敗，重則國破家亡。喺面相當中有乜嘢特徵，最會令男人失去一切？現同大家分析吓！ 撰文：小德
要講女性嘅夫運，一定要睇佢個鼻，因為鼻係代表夫星，如果出現橫紋就表示丈夫嘅運程經常遇上阻滯，如果丈夫本身運勢強，就會將阻礙衝破，否則運程會停滯不前。其中最唔好就係鼻有傷疤，代表丈夫時常會飛來橫災，整體運程包括性趣都會受影響。
另外，女人頭尖額低，大多數係大食懶，好食懶做，本來老公搵錢佢享福都冇問題，但佢哋卻喜歡指指點點，干涉老公嘅工作，由於經常意見多多，令丈夫唔能夠專心工作，影響表現。至於眉毛生得太稀疏，表示自我中心，佢哋唔會理會丈夫嘅工作，萬一工作上出事，更唔會施予援手，由得你死。
古語話口大食窮郎，所以大口嘅女性，都係會影響夫運，口大嘅囡囡若然講嘢唔知節制，咁就會十分大鑊，丈夫帶個老婆去應酬，佢哋得罪人多，稱呼人少，咁你話係咪好麻煩呢！
最後要留意女性嘅頭髮，睇吓佢會唔會特別枯黃同粗硬，呢種女性嘅性格比較剛強，從不妥協，所有嘢都係自己啱晒，認為老公做乜嘢都錯。有咁樣嘅老婆，丈夫想發圍都難，唔好話想發達。遇上以上面相嘅女性，大家都應該識得點做啦？