內地近年愈嚟愈開放，唔單止同志們走出社會，面向群眾爭取福利，連喜歡玩SM嘅朋友都走出街頭，表露自己真實嘅一面，好似最近四川就有位大姐，佢身穿性感透視背心裙，腳着黑色絲襪高跟鞋，用繩綁住上身喺大街上表白自己嘅心態。
呢位大姐姓名不詳，但據街坊講，佢係四十多歲嘅單身女老闆，自己做生意，所以有啲家底，最重要佢並唔係性工作者，唔知幾時開始，竟然熱愛SM運動，為咗讓更多人知道，於是諗到上街遊行，佢當日刻意打扮自己，將頭髮紮個高髻，等自己變成女王一樣，而身上就穿上黑色透視背心裙，裏面着住同樣黑色嘅內衣，再配上黑色絲襪同高跟鞋，外形攞足一百分。
但最重要就係呢位大姐，竟將上身用繩綁實，雙手仲紮咗喺後面，佢咁嘅款走落街，令人意識到嘅並唔係宣揚SM玩意，而係佢可能畀人打劫，於是有途人見狀便第一時間報警，警察趕嚟問話，佢話：「並唔係畀人打劫，只係喜歡着成咁落街行吓啫！」
當地警方查過大姐係正當商人，於是尊重佢嘅人權，畀佢繼續行街。大姐雖然着成咁樣，但冇叫口號，又冇派傳單，你又幾難阻止佢，最後行到天黑就返屋企，之後就喺網上呼籲好此道者，應該學佢咁走出自己嘅狹小世界，向大眾表達自己嘅喜好。
網友對大姐嘅反應較冷淡，反而更多人談論SM有乜好玩？當中反對嘅意見仲佔咗大多數，一般都歸納佢哋係病態嘅一種，需要睇心理醫生接受治療，而贊成嘅朋友，其實只有一個論點，就係任何人嘅行為都值得尊重。此外，但就冇乜人敢話自己想試吓或者想參加相關活動，睇嚟SM玩意都仲係喺萌芽階段，要玩家們公開表態，似乎仲未係適當嘅時候。
撰文：小德