中環出更：銷情連月大跌 鐘錶界憂被淘汰
香港鐘表業總會（總會）早前舉行新一屆董理事會就職典禮，總會新任主席黃麗嫦成為該會成立近七十年來首名女掌舵人，「鐘錶大王」孫秉樞嘅細仔孫大豪「升呢」做副主席。對於本港鐘錶零售數據連月以雙位數下跌，業界中人講起市道個心都涼咗一截，擔心淘汰期將至，其中孫秉樞呼籲業界嚴肅考慮要求國際品牌減出口價，咁先可以同受惠於貨幣貶值嘅國家搏鬥，解決香港名牌冇晒價格競爭力嘅問題。
孫秉樞：可促廠方減價
孫秉樞話，雖然內地打貪及訪港內地旅客減少影響零售市道，不過歐日韓所賣名牌平過香港一大截亦係致命傷，業界可向總會反映，然後由總會聯同業界齊齊向廠方提出減價要求。
太子珠寶鐘錶主席鄧鉅明（Jimmy）面對呢一波寒冬亦要呻苦，事關佢原本打算將總部搬到即將落成啟用嘅北京道太子集團中心，點知遇上經濟不景，惟有臨時變陣將全棟物業出租，收租幫補吓好過。Jimmy仲話，依家市道都仲叫做健康期，但若然繼續向下，就可能步入淘汰期喇！
除咗多個零售行業嘅生意難做，現時連投資環境都好艱難。話說萬希泉創辦人沈墨寧早前買中「地雷股」，隻股票突然間宣布合股又供股，令佢帳面蒸發達九成五，難怪佢形容輸到「攤攤腰」。擁有亞洲最大型金銀幣零售店嘅帝銀集團主席李文偉就話，最近金價終於重返三年高位，表現算係幾好，如果世界再係咁大亂，大家不妨買金喇！
卓妮