愈出愈少

性學專家解釋，精液中主要有兩個成分，一就係精子，二就係精漿，形成精漿嘅主要物質有蛋白質同埋各種唔同嘅酶，以及包含多種化學元素，呢啲物質使用後，係可以正常補充，而補充嘅方法，就係喺日常飲食中，自然攝取就補充得到，只要男士飲食正常，營養均衡，身體健康，咁就唔會出現缺乏嘅情況，而且精漿嘅分泌同補充都好迅速，大家毋須擔心。

而一個正常嘅男士，每次排出嘅精液，大約有3-5毫升，而當中佔百分之九十係精漿，餘下百分之十先至係精子，而精子嘅生長期比較長，一般周期需要三個月，臨床研究證明，連續射精時，只前一兩次嘅精液中精子含量較多，以後就會相繼減少。

影響臟腑

有測驗顯示，連續射精到了後期，射出嘅只係前列腺液、尿道球腺嘅分泌液，當中完全不含精子成分，呢個係人體當中嘅自我調控功能，目的係起自我保護嘅作用，所以男士真係連續射精，實際係無精可射，所以根本不存在「精盡人亡」嘅情況。

但點解連續射精後會出現暈眩虛弱嘅感覺？中醫師認為，當你無法射精嘅時候，肝同腎臟就會抽調大量血液去製造精液，腦部首先缺氧缺血，於是就會有暈眩或者昏倒嘅情況出現，所以中醫一直呼籲大家千祈咪縱慾，因為長期縱慾，腎同肝就等同工廠要經常加班工作，臟腑一經勞損，就會出現腎虧同陽痿，臟腑功能衰退，自會影響性命，所以古人講嘅精盡人亡，係警告大家縱慾引起嘅長遠影響。

撰文：小德