早幾日同班老友北上去夜總會玩，侍應問我哋要飲乜嘢嘅時候，當中一個老友竟然話要飲汽水！聽到佢咁講，即時笑到肚痛！就算唔飲啤酒，都可以叫威士忌或干邑，唔使嗌汽水咁特別呀？點知老友大條道理咁話，莫講話佢買一送一好抵飲，就算買一送三，佢都係企硬唔會飲夜總會啲酒。見佢企得咁硬，就問佢點解？佢好認真咁話：「原因好簡單，因為好多無良夜場為咗賺多啲，都會搵啲水貨啤酒返嚟畀客飲，而呢啲酒來歷不明，冇質檢之餘，裏面仲有好多菌，隨時飲到你肚痛。就算係威士忌，好多亦係出處不明，一樣會出事，所以我一定唔會飲酒。」
其實正如佢所講，好多夜場都會用水貨酒招呼客人，所謂防不勝防，除非你係自帶酒水，否則去夜總會玩，點可能唔飲酒呢？更何況，我哋係嚟買開心，今朝有酒今朝醉，又邊理得咁多！結果我哋嗌到一枱都係酒，由得佢自己飲汽水，免得影響玩樂情趣！
撰文：大軍