最近喺廣州流花區舉辦咗第七屆全國（廣州）性文化節，展期雖然只得三日，但就吸引咗近十萬人次嚟參觀，情況都算哄動，當中最多嘅當然喺單身電車男，佔入場人數嘅七成以上，但女性觀眾都有唔少，而30歲以上嘅少婦更佔咗總人數一成。
買用品增性趣
記者喺現場轉咗半日，發覺真係好多女性觀眾，佢哋入場唔會遮遮掩掩，十分大方自然，就算對住鏡頭都面無懼色，好多係一對對咁嚟，但唔少係單身一人入場，佢哋唔會逼去睇騷，反而走去性用品區，大肆購物，真係好似平時去買衫買鞋咁樣。
有網上專家研究今次嘅情況，點解會咁多熟女觀眾入場呢？專家歸納為三點，第一就係呢個年紀嘅女性，對性知識完全陌生，平時根本冇機會接觸，心裏充滿好奇，於是藉住今次性文化節，喺展覽會包裝下，大搖大擺咁入場了解，增長知識。
而第二點就係呢個年紀嘅女性，大多數都係職業婦女，經濟獨立，乜嘢都得到滿足，但喺性愛方面，就出現嚴重缺乏，就算已婚者，獲得性高潮嘅比例亦都好低，有見及此，佢哋亦會趁大型性文化展嚟會場走吓，買啲可以增進性趣嘅用品。
怨婦解決問題
而最後一批，專家話係深閨怨婦，佢哋啲丈夫都出去拚搏，感情日漸疏遠，於是就嚟展覽會，睇吓有乜嘢可以維繫夫婦生活嘅性用品，買番屋企看吓門口，佢哋真係好似去商場買嘢咁樣，同展銷商職員討價還討，最後掃貨掃到兩手大包小包離場。
無論點都好，證明咗社會愈進步，人就愈會想辦法去解決自己嘅需要，有啲事情可以用錢解決得到，當然用錢去解決啦，但唔好本末倒置，夫妻之間嘅感情，並唔係用錢就搞得掂，咪以為花啲錢買啲性玩意，個老公就會更愛你，想夫妻間感情恩愛，一定要大家多行幾步，所以咪發夢以為花錢就有運行，做人記住都係現實啲好。
特派記者：小德