搶住傾偈

雖然話家陣女多男少，但係各位男士同樣發覺溝女並唔係想像中咁容易，原因有好多，有人就認為現代女仔要求高，有人就認為女仔家陣獨立自主，唔一定需要有男朋友。不過，小記就覺得雖然女仔唔容易追，但係一遇到心儀嘅女仔，大家絕對唔需要思前想後，一於有前冇後，打死罷就！追你咪追你囉！唔接受我最多傷心一陣，然後，再追第二個！

來自澳門利×夜總會嘅嘉琪亦都係咁話，佢話：「咪就係囉！溝女唔需要太多心，其實我哋女仔雖然唔一定要靠男朋友先可以過活，但係我哋都好鍾意畀男仔追，因為有男仔追先證明我哋有質素，令我哋覺得自豪又滿足。所以，大家見到自己鍾意嘅女仔，一定要去搶！不過，我唔係話做強盜搶佢番屋企，而係搶住同佢傾偈，千祈唔好怕醜呀！傾兩句偈冇咩大不了，而且仲可以從傾偈嘅時候等你哋了解呢個女仔，如果發覺佢講說話嘅時候粗魯又唔啱嘴形，咁咪可以快啲放棄目標，轉移搵第二個對象，唔使再浪費時間囉！」

搶先出街

嘉琪又講得啱，因為小記曾幾何時都面皮薄，見到自己鍾意嘅女仔往往唔敢開口攀談，搞到對象畀其他人溝咗先返屋企垂淚到天明，後悔已經太遲！嘉琪嘅好姊妹倩倩都話，執輸行頭慘過敗家，千祈唔好因為怕醜而失去機會。

「好似嘉琪話齋，搶住同對象傾偈固然好重要，但係傾完偈之後，若然發覺對方係適合自己，咁就一定唔好停晒手喇！因為傾得兩句偈，對方對你印象一定唔深，呢個時候，大家就要加多兩錢肉緊喇！例如即刻約對方出街！當然，第一次傾偈之後就約人行街睇戲梗係太過唐突啦！大家其實可以搵機會同對方去行書店，話自己想買本書送畀個姪女之類，想搵個女仔畀意見，如果對方答應咪可以一齊去睇書囉！若然唔答應，又可以追問『乜你唔鍾意睇書咩？咁你平日有咩嗜好呀』？搵到對方嘅嗜好之後，唔使我再教大家都識投其所好，約對方進行其至愛活動啦！」

搶完就鬆

咁又啱，唔傾吓偈，又唔嘗試約對方出街，又點會知道對方有乜嗜好，然後再擬定追女策略呢！不過，嘉琪就表示，搶完之後，一定要鬆一鬆，點鬆法呀？

嘉琪話：「我唔係叫你哋鬆人，亦唔係叫你哋去揼骨鬆一鬆，係要大家放鬆，兼且放低對方一段時間。其實，我覺得溝女就好似釀酒咁，搞完一輪之後，需要將佢放埋一邊，咁樣佢先會慢慢發酵，釀出好酒！如果大家搶攻完一輪之後，就應該休息。如果對方真係覺得好鍾意你，佢會日思夜想你，對你嘅感情就會愈來愈濃，終於有一日會主動搵你出街，到時你就得米喇！另一方面，亦可以畀你有時間考慮對方究竟係咪適合自己，亦畀你再設計更加煞食嘅追女策略，等你哋下次見面可以一擊即中，等對方逃唔出你嘅掌心！而且，搶攻咗咁耐，大家可能未有咁快又有新話題，休息一下等自己吸收其他資訊，傾偈嘅話題又多元化啲啦！」

倩倩小檔案

年齡：21

三圍：34、23、33

興趣：睇戲

嘉琪小檔案

年齡：22歲

三圍：35、24、34

興趣：睇小說

撰文：賢

攝影：強