呢排疫情正喺社區爆發，娟媽身為一個家庭主婦，於是零舍關心，特別小娟仲要返學校考試，萬一染咗乜嘢疫症，成年嘅努力都會成為泡影。於是娟媽就為家居衞生把關，把得特別嚴格，每個鐘頭都用一比九十九嘅漂白水洗地，認真夠晒衞生。
今朝早娟媽用晒啲漂白水，於是落街入貨，行過樓下藥材舖門口，聽見有人喺度直銷，個推銷員講得生鬼有趣，吸引大批師奶圍觀，由於娟媽中間插入，都唔知頭唔知路，於是問前面嘅師奶：「大嬸！咁多人圍住睇，有啲乜嘢好介紹呀？」
大嬸話：「婦女恩物呀！」娟媽不明：「乜嘢婦女恩物呀？」大嬸話：「聽講話有啲窿罅嘅位置，用水洗唔到，用佢呢隻消毒劑，喺嗰啲洗唔到嘅地方，都可以發揮消毒殺菌嘅作用。」娟媽索性問推銷員：「哥哥仔！支嘢係咪咁勁呀？」
推銷員話：「當然，我哋係用中藥做配方，所以陣藥味都可以殺到菌呀！」娟媽：「用中藥，咁會唔會好臭呀？」推銷員話：「當然唔臭，你聞吓幾香？一支都係$19.9咋！」
娟媽於是問咗十幾支，點知返到屋企用唔到嚟拖地，大家知唔知道點解呢？
1. 娟媽買錯殺菌洗頭水
2. 娟媽買錯殺菌潔陰液
3. 娟媽買錯殺菌洗潔精
4. 娟媽買錯殺菌眼藥水
答案：
2. 娟媽買錯殺菌潔陰液
解釋：人哋推銷緊潔陰液，所以特別標榜消毒殺菌，但娟媽聽得一半，見人哋話用咗之後連陣藥味就可以殺菌，佢又打算偷懶，於是諗都唔諗，人買佢又買，其實大嬸一早就講咗，賣緊婦女恩物，只係娟媽太過投入抗疫行動上面，所以今次誤會，絕對唔可以怪娟媽。
小德