血型影響愛靜

我哋首先睇吓今年20歲、出生於長野縣嘅中村美樹，點解咁怕出風頭呢？美樹話：「我份人自細就好喜歡靜，可能本身係A型血嘅關係嘛，所以為人有時比較內向，當然要做工作或者演出嘅時候，就會唔怕，但一個人嘅時候，就好想安靜一下。」

難怪美樹租間屋都要租到去好偏僻嘅地方，就係希望可以靜吓，點知狗仔隊仲以為佢「闢室偷情」，於是成日大棚人喺佢屋企守候，最後當然得個吉。但大家都好奇怪，入得行做女明星，又點樣可以唔出風頭呢？唔係愈出風頭就會愈紅嘅咩？

美樹話：「一個明星紅與唔紅，跟佢嘅風頭冇關係嘅，你睇吓啲大牌明星，佢哋一啲新聞都冇，又少出席公開活動，但當佢哋一出嚟做嘢或者做宣傳，自然成為焦點，所以紅與唔紅同出風頭無關，主要係睇你自己有冇實力。」睇嚟阿妹想做實力女星喎。

學打坐靜心身

原來美樹愛靜怕出風頭，可能同佢自細修練少林拳有關。美樹曾經表示，自己細個係個藥煲，經常生病，後嚟跟師傅修練少林拳，身體慢慢好咗，所以到家陣都會練習，而美樹除咗打套拳之外，仲要練埋打坐，所以佢特別需要安靜嘅環境嚟修練。

美樹咁喜歡寧靜，將來揀男朋友，使唔使都要愛靜嘅呢？美樹話：「呢層最好，大家都喜歡靜，最少都唔會成日鬧交啦。」最後美樹補充：「我喜歡靜，但唔會脫離社會，放棄工作，我會繼續努力工作，做出好成績，等多啲人認同我就已經足夠。」

至於21歲嘅小泉麻耶，又點解咁怕出風頭呢？麻耶話：「我怕出風頭嘅主要原因，就係怕見到啲記者，見親佢哋都有嘢要問我，一個對一個訪問，我會對答如流，一啲問題都冇。但如果人太多，我就會思想混亂，經常會講錯嘢。」

甘做隱蔽女星

見親記者都係人多嘈雜喎？麻耶話：「所以我咪唔想出風頭，少啲見記者囉！」但係做明星點可以唔接受訪問呢？麻耶話：「我會接受個別嘅訪問，你有所不知，自己冇新聞見報，責任唔喺我度，但我講錯嘢，就係我嘅責任，點可以唔小心。」

平時喺屋企靜唔靜㗎？麻耶話：「我一個人嘅時候，有時都會開少少電視，等屋企有啲聲。」成間屋得你一個人習慣嗎？麻耶話：「我非常習慣，反而同人一齊住就會唔習慣，事關我返到屋企，喜歡唔着衫通屋走，你話係咪一個人住方便啲。」

咁唔怕畀人話你係隱蔽女星咩？麻耶話：「人哋鍾意點寫係人哋嘅自由，我只要努力工作，不斷有表現畀觀眾睇到，咁就夠啦。猛出風頭，但工作一啲都唔認真，咁又有乜嘢用，風頭一過咪一樣打回原形，要屹立不倒，講嘅係實力而唔係風頭。」

小泉麻耶小檔案

出生日期：1988年7月2日

身　　高：163cm

三　　圍：35、23、34

興　　趣：上網

撰文：小德