直播激戰打孖上
「中銀人壽香港超級聯賽」次循環進入直路階段，今日共上演兩場關乎爭標命運的激戰。頭場傑志下午3時於主場旺角大球場撲擊晉峰，力爭勝利鞏固榜首優勢；尾場理文下午5時30分，坐鎮將軍澳運動場恭候天水圍飛馬，主隊為爭標不容有失，務求盡擸3分到手！（on.cc東網周日下午3時起直播）
理文要追分惡鬥天水圍飛馬
今日港超尾場由理文迎戰天水圍飛馬。理文上仗不敵榜首傑志，為免再被拋離今場不容再失，惟球隊正受傷兵困擾，金承龍及荷西安祖等上陣成疑，主教練陳曉明希望情況盡快好轉，好消息是中場顏樂楓已復操，有望重返大軍名單。
「曉明Sir」不忘初心
上仗吸引1,872名觀眾入場，打破今季將軍澳運動場的紀錄，「曉明Sir」不忘感謝球迷，他樂見近日網上有不少支持球隊的留言：「希望大家明白我哋想搞好港足嘅初心；成績係重要嘅因素，但方向都要正確。」理文今季3對飛馬保持全勝，該3仗皆有披甲的黃俊皓直言對飛馬愈來愈難踢：「開頭佢哋冇參加復賽狀態差啲，但飛馬外援質素高，絕對唔易踢。」
天水圍飛馬上仗兩度落後下反勝冠忠南區，主教練郭嘉諾指球員展現爭勝心。雖然今季3鬥理文全部見負，但他認為上循環對壘雙方踢成均勢，今次作客草地質素佳的將軍澳場，球隊不見得「蝕底」，反而有利發揮。至於刑滿復出的謝朗軒今季較常踢翼鋒，他對重回年少時慣常出任的位置感高興，並重拾進攻的感覺。「謝朗」過往曾外借到理文，對該隊有一定認識：「佢哋外援質素高，所以大家要互相補位，聯防做得一致，同埋要留意佢哋成日趁對手唔為意快開罰球。」
傑志保優勢猛炸晉峰
聯賽不敗之師傑志暫領先次席東方龍獅4分，衞冕形勢不俗，惟球隊總教練朱志光坦言「唔敢講冠軍住」，認為各隊均有失分空間。「藍鳥」上月底首循環曾以3比0輕取晉峰，惟「朱Sir」強調晉峰是支善用皮球且甚具活力的球隊，絕對不易對付。
何振廷獲重用踢得舒服
傑志除正休養的蘇沙外並無傷兵，艾力士和謝家強亦可隨時候命。「朱Sir」指前者早前一直維持訓練，狀態不成問題，但需重拾港超節奏。另外球會宣布與彭林林和陸建鳴達成解約協議，二人已離隊。季初外借回收的何振廷近3仗均打正選，這名傑志青訓產品認為自己表現尚可：「做到教練叫我做嘅嘢，但有時喺後場攞波及轉身嘅決定可以再好啲。」他又謂今季為母會出任的位置比去年在大埔更前，但他表示自小在傑志皆是踢攻中，故現在感「踢得舒服」。
晉峰上仗5球不敵東方龍獅，遭遇兩連敗，賽後總教練何信賢直指後備球員心理質素及對抗性需要加強。球隊今仗續有費利浦薩及佐敦布朗缺陣，短期內再鬥傑志，「何Sir」直言「惡啃」。前鋒何思哲今季尚未開齋，他自稱落場時仍會緊張。球隊近兩仗皆未有入波，「阿哲」承認自己有一定責任：「有啲決定可以做好啲同快啲，有機會就盡量起腳。」