韋婉婷想踢前鋒鍾意Free
香港女子足球隊代表韋婉婷上月中轉投阿爾巴尼亞聯賽勁旅維拉斯尼亞（Vllaznia），並於剛過去的周日出戰「榜首大戰」，協助球隊以0比0作客賽和阿普朗尼亞（Apolonia），維拉斯尼亞在榜首依然有領先5分的優勢，假若今日能於主場擊敗中游球隊Kinostudio，便可提前一輪捧走聯賽冠軍，並鎖定歐聯外圍賽資格。
爭取為維拉斯尼亞入波奪冠
對於球隊在5日內連踢兩場聯賽，「韋婉」透露目前所練兩課訓練內容均較為輕鬆，並以球員恢復狀態、企位及射門為主，而自己的肌肉恢復在較多休息時間下，情況亦較為理想。「韋婉」亦指，上仗未能鎖定冠軍當然失望，但亦要盡快忘記過去︰「嚟到呢度之後覺得喺心態轉變上，係要好快收拾心情，再去準備下一場比賽，所以唔得都要得，要學識點去應付！相比起之前對較強或者冇咁強嘅對手，預計呢場嘅對手係屬於中等，希望自己可以多番些少個人突破，同埋最需要喺埋門方面作出改善。」
過去幾場賽事均出任中場中位置的「韋婉」，上仗大部分時間則被安排改踢右前鋒，她坦言希望有較多參與進攻的機會︰「球隊練陣形嘅時候，開頭放我去右前鋒，跟住亦有調我去踢中場，對於我嚟講打呢兩個位比較，打前鋒一定Free啲，但如果踢番落中場都係另一種學習。」至於賽事方面，將於今日當地時間早上10時開賽，即香港時間下午4時。