放眼來季愉園復賽志在練兵

本地波停擺超過3個月，由佳聯元朗轉投的「戰神」曾至孝對復操感興奮：「始終未試過咁耐冇踢波，感覺有啲陌生但又好開心！」對於即使復賽後也未必能夠代表愉園出戰，「戰神」仍十分樂觀：「當Pre-season一樣，跟番教練安排練波，同隊友磨合，影響唔會太大。」另外愉園亦出現了大量球員變動，當中4名外援球員離隊，接下來的比賽將會以青春班出戰。「快活谷」總監潘文迪對此並不擔心：「始終愉園都係放眼來季，今季盡量畀多啲機會佢哋吸收經驗，希望下季更加成熟！」

注重防守吸收經驗

話雖如此，但多名外援離隊，包括首席射手加維蘭，或多或少會帶來影響，主教練鮑家耀表示無奈：「冇咗咁多外援，踢法一定會受影響，之後我哋會更加注重防守同反擊，目標係至少唔好大敗！」

談到近期的球圈熱話，來季「註6出5」的外援名額安排，潘文迪重申會方不同意的立場：「愉園方針都係希望培養年輕球員，另外疫情過後好多本地球員冇班落，球隊希望『接濟』佢哋多過簽外援。」但個人立場則支持，因為：「可以吸引多啲Fans入場支持，同宣傳到本地波。」

圖/文：李浚湣