富力R&F開操 杜度林恩許報到

富力R&F昨晨於烈日下進行訓練，幾位早前需要接受隔離的球員，包括迪布利、基奧雲尼及古拿皆已經解禁歸隊，講到訓練場上的焦點，當然是杜度和林恩許兩位新臉孔，兩人加盟富力R&F後的首課操練，以慢跑和傳球訓練為主，已有一段時間未有參與團體訓練，兩人訓練過後都「身水身汗」，主教練楊正光認為一對新援操練態度可嘉：「林恩許同杜度已經喺香港踢咗幾年，無論對球員或環境都好熟悉，可能因為太耐冇落場訓練，今日精神面貌都好好，不過依然需要時間同球隊磨合。」

土炮後衞將加盟

至於對兩位新援的調配，楊Sir就這樣解釋：「林恩許喺中前場勝任多個位置，防中又得，進攻中場亦得，踢影子前鋒更加好，所以進攻調配上靈活性會更加大。至於杜度呢兩年喺和富大埔表現非常稱職，一樣好突出。」楊Sir亦透露近期球隊會再引入一名本地後衞，進一步加強後防人腳。

老友重逢特別開心

加盟富力R&F，杜度最開心，因為可以同前隊友伊高沙托尼再次並肩作戰：「我哋之前都有傾過偈，佢同我分享唔少球隊嘅情況。」

這位前和富大埔中堅，過往曾與伊高沙托尼合力為「綠戰士」贏得聯賽冠軍，一同經歷過難忘時刻，杜度展望新挑戰的同時，亦不忘感謝昔日支持過自己的球迷：「好感謝和富大埔對我做過的一切，同埋一班大埔球迷，依家我會專注為新東家贏冠軍，呢個會係我嘅首要目標。」杜度亦希望前東家的欠薪問題能盡快得到解決，他強調無人願意挑起紛爭，只想所有人能夠取回應得的薪水。

林恩許期待新挑戰

至於由傑志來投的林恩許（Jared），亦談及自己加盟富力R&F的原因：「我喺傑志效力一段好長時間，係傑志畀我喺香港踢波嘅機會，不過呢段經歷已成過去，依家我係富力R&F嘅球員，好期待接下來嘅新挑戰。」Jared對新隊友絕不陌生，林志堅、林柱機及盧均宜都曾是他的昔日傑志隊友，有熟悉臉孔在身邊，Jared相信更容易融入球隊，並表示會專注留港發展，爭取得到特區護照。

圖/文：林卓臻