陳婉婷怕唔夠佢打！

Ｑ：你覺得作為女性教練帶男子足球隊，比較起男性教練有冇甚麼困難？有冇試過遇上一些印象深刻的事情？例如在更衣室？

牛丸：有呀，更衣室有好多嘢睇！主要困難係男女本身思想上有不同，加上我並非職業球員出身，較難明白球員所想，感恩助教們一直幫助。而且有時球員會有情緒，試過出口又出手，我當時就有啲唔知點算，因為唔夠佢哋打。

球員時期的「牛丸」。

放大圖片

Ｑ：『牛丸』你好，請問你在大陸執教國家隊女子隊，有冇甚麼難忘事件？想問下你會否回來執教港超球隊。祝福你身體健康，工作愉快。

牛丸：我現在留在香港，因疫情關係，未確定是否回國家女足，謝謝關心。其中一樣難忘的是球員非常有紀律，服從性很高，但對我來說在球場上過分依賴，不夠自主，所以我要經常以情景式和問題式去訓練，但她們其實也很可愛，我暫時都希望在海外發展，所以未必會留港。

Ｑ：帶隊最難忘係邊場比賽呢？

牛丸：『亞冠』第一場作客恆大輸0比7，兩個紅牌，場內外、賽前賽後都好多事發生，好深刻，因為自己冇2nd plan，冇預計過會咁，雖然好痛，但人生需要從失敗中學習，知道自己係幾渺小。

Ｑ：依家仲係唔係喺中國足協度做女足事務？

牛丸：暫時係香港失業，因為疫情關係，一直未完成同中國足協傾續約的事宜。

Ｑ：你會唔會喺更衣室鬧球員打得唔好？

牛丸：我一般好少鬧球員，我認為激勵比喝罵較大作用。通常會較易令我嬲既係態度問題，記得2016年贏咗聯賽冠軍之後，最後一場對傑志嘅例行公事，上半場已經輸幾球，我半場就會好嬲，因為係態度同專業問題。

Ｑ：有冇諗過帶海外女子國家A隊？

牛丸：有呀，好想！最想有一日帶隊打世界盃。

Ｑ：您好陳教練，能否分享一個在執教中國女足小將時非常難忘的事？雖不在香港生活，但一直關注着您，覺得您很有才華要向您學習。感謝。

牛丸：去年在中國女足國家隊得到很寶貴和愉快的經驗，最難忘是『亞少盃』決賽周第一場對南韓，對出線非常關鍵，當日大家好有決心，我第一次見到女孩們眼中有火，而且是笑着走進球場，享受比賽，最後我們亦成功以2比0贏波。

Ｑ：你覺得香港足球應該要朝住甚麼方向前進？有咩建議畀現在處於青少年階段嘅球員，令佢哋放心踏入職業足球路？

牛丸：香港足球的踢法係跟日本定西班牙定其他，我覺得不是最重要，但需要嘅係長遠同團結，依家我哋連對南亞球隊都好吃力，東亞西亞更加距離愈來愈遠，搞好青訓需要球會同足總共同努力。要令球員放心入行，需要有平台畀佢哋比賽，要睇到有機會踢具水平的比賽及外流，最重要都係聯賽同球會要有專業的管理，薪金和保障制度要完善。

Ｑ：『牛丸』，你好！首先謝謝你多次為香港人爭光！我知道你也是踢女子足球的，請問若果想提升香港女足到日本女足的水平，有哪些事情是可以做的？

牛丸：日本的女足歷史悠久，文化亦不同，要追趕日本的水平有難度，因為自己進步的同時，日本都在進步，例如日本的女足職業聯賽即將推行。香港女足面對硬軟件不足問題，但近年已飛躍進步，青訓日漸見成果，相信5年後更為明顯，我們需要再推廣女足普及化，增加足球人口，提升不同組別的聯賽水平和競爭性，鼓勵女足成為教練包進修，幫助球員外流等。

Ｑ：可分享吓你平凡的內心嗎？1. 最尊敬的人、2. 最難忘的事、3. 紓壓的方法、4. 短期的目標。

牛丸：1. 郭家明先生、曾偉忠先生；2.人生最難忘暫時係東方2015-16攞聯賽冠軍；3.做運動、聽歌、食黑朱古力、飲咖啡；4.繼續外闖，希望有一日參與世界盃。

Ｑ：有甚麼嗜好？

牛丸：鍾意踢波、歎咖啡、聽慢歌、睇勵志書同勵志片，偽文青。仲鍾意同好朋友傾偈玩遊戲，會好嘈。

Ｑ：如果香港有球會搵妳做主教練，妳會唔會考慮返嚟教？

牛丸：依家疫情關係，有機會教波已經難能可貴。如果可以選擇的話，我個人目標都係希望海外發展，想見識多啲嘢，將來帶番香港足球。

Ｑ：陳教練，課室足球理論，同實際教一隊職業波，分別係邊度？

牛丸：現在足球涉及很多不同層面的知識，例如運動科學、體能設計、營養學、運動醫學、管理學等等，作為專業教練要具備相關知識。但肯定的是，很多運動都不能紙上談兵，所以實際經驗和場地訓練、比賽尤其重要，教練需把知識運用到球場，但足球是千變萬化，不斷更新，而且每支球隊的背景、球員又不同，所以教練最重要是懂得因材施教，危機處理，臨場應變，仲要有個人領袖的風格和修養。

Ｑ：有冇諗過同黃耀富合組球壇Twins？

牛丸：記得唔知邊日，突然有一個人話我同『富哥』好似樣，之後有一百個人都話似。有一日光Sir（楊正光）喺球場又話介紹我細佬『嘉耀』畀我識， 其實同兩位相似都係我光榮，希望有獵頭公司睇中我哋三個，可以出道。

黃耀富：『牛丸』，你最欣賞嘅左腳球員係邊個？

牛丸：『富哥』又畀考驗我，你隻左腳已經99分，不過『大眼仔』(即黃展鴻)就多你一分。

Ｑ：有冇暗戀過邊位球員？幾時結婚？

牛丸：當係呢個圈愈耐，同啲球員愈熟，就真係好難會『暗戀』到佢哋。不過欣賞嘅球員就有好多，我會較鍾意踏實同態度好嘅球員，而我亦發現啲球員結婚生仔之後會更有男人味。我自己就未有打算結婚，事業心重，可能最後會同個足球結婚。」

Ｑ：香港女性喺職業球壇算係少數，『牛丸』你覺得一個小眾喺大圈子立足，應該要證明自己獨特性，定係應該證明自己同其他人同等呢？

Ｑ：帶隊最難忘係邊場比賽呢？

牛丸：問得好，我認為人唔應該劃條線畀自己，大眾定小眾係睇你自己點睇。作為教練，毋須刻意證明自己是獨特或平等，足球世界有能者居之，愈想證明自己會愈失去自己，而且光芒應該係畀球員唔係畀教練。做教練要以平常心做好自己的工作就很足夠了，別容易受人影響，更不應把別人問題變做自己問題。

葉鴻輝

盧均宜 法圖斯 荷西安祖 張健峰

白鶴 華杜斯

佐迪 伊達 李康廉

卡里祖

「感謝『我撐本地波』同『大頭哥』安排，多謝大家的提問，希望將來再有機會盡訴心中情。」