近排好多港超聯球員喺疫情期間行山鍛煉體能，但講到行得最勁嗰位，都算係東方龍獅中場黃威嘞。佢日前夥同隊友鍾偉強、陳浩瑋，挑戰被稱為「香港三尖」之一嘅蚺蛇尖，仲分享行山心得添！
蚺蛇尖位處西貢，因為地理偏僻、路途崎嶇，所以難度甚高。黃威透露，當日佢哋由北潭凹出發，爬至蚺蛇尖後轉落大灣，再行番去西灣亭轉的士返西貢，全程只係用咗3個鐘！行得咁快，真係唔話佢係行山專家都唔得，黃威就咁講：「呢排冇得練波，快上快落咪當練吓體能。」
黃威覺得蚺蛇尖係全港最難行嘅山：「其實前排已經行過蚺蛇尖，嗰日諗住行其他山，但既然全港最難行嗰座山都行過，其他山好似冇咩挑戰性，所以選擇行多次。」佢認為比起另一座屬於「三尖」嘅山釣魚翁，蚺蛇尖嘅難度更加高：「臨尾上山200至300米升得好快，嗰段路要手腳並用咁爬，雖然釣魚翁有部分路段都難行，但需要手腳並用嘅一段其實好短，我覺得蚺蛇尖難度高過釣魚翁好多。」不過「三尖」對佢嚟講，其實仲未行晒，唔知黃威幾時征服埋青山呢？