近日港超聯冇波踢，球員除咗行山練體能或者喺屋企「的波」「的廁紙」，都冇咩特別事可以做。不過，之前試過涉足演藝事業嘅佳聯元朗門將黃梓豪，近日就成為「網絡KOL」，喺社交媒體直播唱歌之餘，仲間中同友人合作拍片放上Youtube，實行「波演雙修」。
相信有留意開呢位20歲足球小將嘅球迷都知道，又靚仔又有表現欲嘅「梓豪」，之前參加過電視台嘅藝人選拔。雖然最後冇被選中，但「梓豪」睇嚟對演藝好有興趣，近日佢喺社交媒體不時開Live同拍檔一展歌喉，觀眾都唔少o架，最高峰去到200個，作為一個20歲o靚仔嚟講算唔錯o架啦！
之後記者仲發現佢喺Youtube同一位拍檔開咗Channel，訂閱數有近2,000名添。當中影片包括生活、行山、舞蹈等唔同範疇，全面展現「梓豪」喺球場外嘅另一面。